Mungmyit Sinli hta Uphkang Nga ai Kokang MNDAA dap ni Shinggyim Ahkaw Ahkang Tawt Lai Nga
Mungmyit Sinli ginra hta Myen hpyen dap yawng hpe htim shagrawt kau ngut ai hpang, Kokang MNDAA dap ni kaw na, mara kata mung shawa ni hpe sat ai lam ni lani hte lani grau grau law wa taw nga ai nga ginra masha ni tsun ai re.
Ya ten Kokang MNDAA dap ni gaw Mungmyit Sinli ginra hta mazut ai lai ladat hte, mung shawa ni hpe up hkang taw nga nna, shinggyim ahkaw ahkang tawt lai ai lam ni byin taw nga ai nga, Kutkai ginra masha langai KNG de tsun ai re.
“Miwa Kokang ndai ni grai mazut ma ai, mugn shawa langai a asak hpe hpa n shadu ma ai, shan hte n tsen n hten ai ni hpe san jep, san jep na n htai yang bai adup abyen rai , ya hte mung anhte jinghpaw la langai hpe mung lata shalai zingri sat kau ya ma ai,” nga tsun ai re.
Ndai shata praw 2 ya shani hta mung Kutkai Kawng Hka mare na asak 34 ning re Slg Zau Seng hpe sat lup makoi da ai kaw na mare masha ni wa htu shaw la let, a tsawm sha bai lup makoi ai lam galaw wa sai re.
Dai zawn sha Munggu mare hta mung lai wa sai shata hta Kokang dap ni kaw na sinat hkrup mara gap shadam ai majaw, ma kaji langai asak si sum wa sai re.
Ya ten Kokang dap ni gaw shan hte htim gasat zing madu da ai shara ni hta, amyusha lam hta garan ginhka myiman lata nna up hkang taw nga ai nga dai ginra na amyu shayi langai KNG de matut tsun dan wa ai re.
Mungmyit Sinli shara nkau hta Kokang dap ni zing madu na uphkang taw nga ai hta, shinggyim ahkaw ahkang tawt lai ai lam ni law law byin taw nga nna, dai ni uphkang ai hpe ginra masha ni n ra sharawng ai lam ni byin nga ai re.
