Sammung Dingdung daw, Mungmyit Mare kaba hpe KIA woi awn ai hte, dap hpawm hpung ni maga, dai hpawt January 18 ya jahpaw hkying 5 daram aten kaw na sa htim gap gasat taw ai lam chye lu ai.
Mungmyit mare kata na Balik dap hpe shawng sa htim gap gasat ai rai nna, dai kaw nga ai Balik hte hpyen la ni yawng dawn hkawn hpraw sharawt nna, asum jaw wa nna, nkau byuha dap de hprawng ma ai lam ni nga ai nga dai ginra na lit nga ai Salang langai KNG shiga dap de tsun dan ai re.
“Balik dap kaw rawng taw ai ni gaw, dawng hkawn hpraw sharawt na asum jaw ma ai, nkau gaw byuha de hprawng yen ai ni nga ai, ya ten Myen hpyen byuha hpe matut htim gasat taw nga ai, dai na jan du wa du hkra naw gap gasat hkat nga ai,” nga tsun dan ai re.
Muklum htim shagrawt majan hpaw ai hta, mung mare masha nkau gara de n lu hprawng yen ai sha muklum kata pat hkrum taw ai ni mung nga ai rai nna, Myen hpyen dap maga mung nbungli hte sa htim gap gasat ai lam ni nga taw ai hpe chye lu ai.
Ya ten dai mare kaba hpe matut htim shagrawt taw nga ai rai nna, Myen hpyen byuha dap kaw nna, laknak kaba ni hte laja lana ninghkap shingla gasat taw nga ai re.
Mungmyit mare hta, Hk.L.Y. 223, Hk.L.Y 276 dap, Hk.M.Y 348 hte Manmaw စကခ npu dap dung ni, dap jung ai shara re lam chye lu ai.
Dai shara gaw, sammung, Mandalay Sagaing ginra ni hte matut ai mare kaba langai rai nna, hpyen masa lam hta ahkyak ai mare kaba langai re lam, dai ginra na mung shawa langai ndai zawn matut tsun dan wa ai re.
“Mungmyit mare kaba gaw, Mandalay Madaya mare lam de na matu ahkyak ai, Mandalay de yu na rai yang dai shara ni hpe shawng jasan kau na she mai sa na rai nga ai, dai kaw na na pru wa yang, Tabekkyin, Madaya, Kusinku, ding yang mare kaba ni nga ai re, ngut na Mandalay Manmaw lam a matu mung ahkyak ai mare kaba re ga rai nga ai,” nga tsun ai re.
Dai ginra hta lai wa sai January praw 1 ya shani kaw na majan byin hpang wa ai rai nna, Mungmyit mare hte deng 6 daram tsan ai Sinkyin mare na Myen hpyen dap Hk.L.Y 223 dap hpe Balawng TNLA dap na sa htim gap gasat zing madu wa ai re.
Mungmyit Sinli ginra yawng hta, lai wa sai January 11 ya shani kaw na Myen hpyen dap hte dingdung daw dap hpawm hpung ni maga, Miwa lapran salang tai ya ai hte gap hkat jahkring tawn ai ten re.