Ndai laman Jinghpaw mung de shani shana marang htu kaba ai majaw, Hpakant lam lai n mai mat hkra lam lapran mawdaw chyat taw ai nga, ginra masha ni tsun ai re.
Lai wa sai bat lahkawng kaw Namting mare ka-ang mawdaw lam hka lim ai hpang kaw na, Namting mare grup yin lam nya nna, hkumpup sung lam hten nga ai majaw, gunrai htaw mawdaw kaba n kau dai hkumpup lam n tsa kaw galau ai lam ni byin taw ai nga, dai ginra na mung shawa ni tsun ai re.
“Namting mayan gaw tsun pyi n ra, moi na prat bai du mat ai hpa, hkum pup n chyang daram pyi du ai, dai kaw mawdaw ni mung ရုန်း tik tik hkum pup nau sung ai majaw, gunrai htaw mawdaw lahkawng galau mat ai, mawdaw numlai na pyi yak ai,” nga tsun ai.
Ya lam hten dik taw nga ai shara gaw, Hkumtsaizup hte Gat Noi mare lapran rai nna, sawng dik gaw, Namting kaw re lam chye lu ai.
Dai Namting mare kaw lai wa sai shaning KIA gasat zing la ngut ai hpang, lam galaw na matu lam htu ahka da ai shara kaw na ya grau sawng mat ai re nga ginra masha langai wa mung n dai zawn matut tsun ai re.
“Dai Namting kaw nga nawng galaw nna nga ai lauban langai nga ai, dai wa galaw ya na ngu na Shanglawt ni hpe tsun na htu ahka da ai rai nga ai, kaja nan tsawra myit hte galaw ya na hkyen da ai gaw rai lu ai re ma, Myen ni bai zing kau ai hpang gaw, dai hku moi na zawn magwi ni hte dun rai na bai lai taw ai ga rai nga ai,” nga tsun ai re.
Hpakant lam gaw, asuya ban hte ban lam gram ai ni gaw n nga na, hta sha na hkrai myit ai majaw, ya na zawn hten ai re nga matut tsun ai.
Ya ten Namting mare grup yin kaw mawdaw lai n mai ai majaw, Hpakant lam n tsa mawdaw tsa lam pat hkrum taw ai hpe chye lu ai.
