Mungmyit Sinli, Balawng TNLA dap ni zing madu da ai, Namsan, Nam Du mare kaba ni de Myen hpyen dap kaw na Sau, N-gu, Jum, Jak sau hte kaga tsi mawan ni htaw shalai ahkang n jaw pat hkum da ai majaw, ginra masha ni yak hkak taw nga ai lam chye lu ai.
Nam San, Nam Du de shang wa ai lam kaba ni yawng hpe Myen hpyen dap gaw shagyit hkap let san jep taw nga ai majaw, dai ginra de gunrai htaw shalai na hta madung ahkyak ai sau n-gu, tsi mawan ni hpe n lu htaw shalai ai majaw, dai ginra de na mung shawa ni yak hkak jam jau wa taw nga ai lam, dai ginra na mung shawa langai KNG shiga dap de ya na zawn tsun dan wa ai re.
“Hkrun lam hkawm ai ni hpe gaw lai shangun ai, mawdaw kaji kaba ma hkra hpe sawk jep ai, Sau, N-gu, Jum, Jak sau hte tsi mawan ni hpe tsep kawp n shalai ai, kachyi sha mu tim rim la kau ya ai, Myen hpyen dap dai hku galaw taw ai majaw, anhte mung shawa ni yak hkak ai ga rai nga ai,” nga tsun dan ai re.
Ya ten Nam Du Nam San mare de wa na rai yang, mawdaw lam kaba 3 hku na mai wa ai hta, Lashio – Man Tsan lam, Ti Paw – Pang Lung lam, Kyauk Me – Mai Ngaw lam ni re lam chye lu ai.
Lashio Man Tsan lam hku rai yang, myo koi Tool Gate hte Myo koi AD mahkrai gate lahkawng hta Myen hpyen dap ni dung ai rai nna, Ti Paw – Pang Lung lam hku gaw gara mawdaw hpe mung Myen hpyen dap n pru shangun ai lam chye lu ai.
Bai nna, laga lam langai rai nga ai, Kyaukme – Mai Ngaw lam kaba hku lai law taw ai rai nna, dai lam kaba n tsa hta Myen hpyen dap ni dung nna, san jep ra ai ni hpe san jep ngut ai hpang ding yang dai hku lai shangun taw nga ai lam chye lu ai.
Ya na dai lam ni hku na lai ai rai yang, shawoi na hta htam 10 daram grau ma jat nna, hkawm sa taw nga ra ai re lam chye lu ai.
Ya ten dai ginra na mawdaw la ni, nam lam hpe sha madung dat let hkawm sa ra taw ai rai nna, ya ten jak sau liter mi hta 7000 jaw nna, mari lang ra taw ai hte, yu maya n-gu buri mi sen mi mun lahkawng hte mari sha ra taw ai majaw, ginra masha ni hta yak hkak taw ai rai nga ai.
Namsan mare gaw gunrai ni hpe Kyauk Me kaw na madung htaw ginlen la ai rai nna, Namdu mare gaw Lashio kaw na madung htaw shalai la ra ai rai nna, ya ten dai lam ni hpe Myen hpyen dap pat kau ya ai majaw, malu masha gun rai htaw ginlen la na lam hta yak hkak wa ai rai nna, aten galu na matu mung shawa ni myit tsang wa taw nga ai re.
Namsan mare hpe Balawng TNLA dap ni December 15 ya shani htim gasat zing kau nna, Namdu mare hpe December 18 ya shani htim gasat zing madu kau nna, ya ten dai ginra hta Balawng TNLA dap ni a uphkang masa hte sa taw sai shara mung rai nga ai.
