Namhpakka mare kaba hpe Wunpawng Mungdan Shanglawt Hpyen dap KIA dap maga rai n lu gasat zing ai zawn majan matut laja taw nga ai lam, Dukaba Naw Bu tsun ai re.
January 16 ya shani KIA dap maga Myen hpyen Jet Fihter nbungli langai hpe gap jahkrat kau ya ai gaw, Namhpakka Myen hpyen dap makau Manau yang hta wa hkrat ai majaw, dai nbungli de nlu sa hkra Myen hpyen dap maga makawp shingla gasat taw nga ai majaw, majan laja taw nga ai lam, Dukaba Naw Bu ndai zawn tsun ai re.
“Nbungli hkrat ai gaw, Namhpakka 123 dap makau wa hkrat wa hkrat ai, anhte sa yang Myen ni mung gap ai, Myen ni sa yang mung anhte gap ai, dai majaw lahkawng maga mayak nga ai, dai majaw အချက်အလက် ni ma hpa rai n lu la shi ai, dai hku majan naw laja taw nga ai,” nga tsun dan wa ai re.
Ya ten Namhpakka Myen hpyen dap hpe KIA dap maga, wang matep da let gap gasat taw nga ai rai nna, Myen hpyen dap maga na mung, ga gaduk kring mading shagreng da nna, ninghkap shingla gasat taw nga ai zawn, n bungli kaw na hpyen n-gun laknak arung arai ni ding yang wa htaw sa ya taw nga ai majaw, dai shara hpe gap di lu na yak hkak taw nga ai lam, matut chye lu ai.
Namhpakka Myen hpyen dap gaw, Mungmyit Sinli lahta daw Kutkai Muse, Mungbaw Munggu ginra ni a matu ahkyak dik dap shara rai nna, dai dap shara hpe n tat sum hkra Myen hpyen dap maga ninghkap shingla gasat taw nga ai re.
January 14 ya shana dai Myen hpyen dap kata de gan lu shang ai rai tim, Myen hpyen dap maga de na, dap makau grup yin yawng hta bawm hkam shajawng da ai majaw, bai htingnut pru wa ra ai re lam chye lu ai.
Namhpakka Myen Hpyen dap hpe KIA dap maga htu shadut htim gasat taw nga ai shata mi daram du wa sai rai nna, ya ten lahkawng maga dap majan matut laja taw nga ai re.
