Myitkyina Rambu lawk hta, Phone wan bang da let ginsup taw ai kaw na, Phone hkru kapaw wa ai majaw, shan wa ni marai 3 hkala hkrum wa ai lam garum ningtum hpung ni kaw na chye lu ai.
January 15 ya shana hkying 8 daram aten, nta kaw Phone wan bang nna, phone ginsup taw ai kaw na, Phone kapaw wa ai majaw, dai makau kaw nga taw ai marai 3 hte hkala sawng wa nna, Phone wan hte hpyi ni yawng malu ma nga, Myosetthit garum kahtau hpung na lit nga ai salang langai KNG de ndai zawn tsun dan wa ai re.
“Anhte du wa yang n ta npu kaw la taw ma ai, Phone wan bang da let ginsum ai kaw na kapaw wa ai re nga, shan wa na masum rai ma ai kasha yan gaw hpa nau n ra ai, kawa gaw loi tsang ra ai masa re.” nga tsun dan ai re.
Dai kapaw wa ai hta, Phone lang taw ai kawa ngu na wa hkala sawng nna, kasha numsha yan lahkawng gaw lata hte myiman ni hta hkala hkrum wa ai lam chye lu ai.
Ya ten dai machyi hkrum wa ai shan wa ni marai masum hpe Myitkyina mung shawa tsi rung hta htaw sa da ai rai nna, hkala sawng ai kawa ngu na wa gaw, loi tsang ra ai masa nga ai lam tsun ai re.
Myihprap wan hpe jai lang ai ten, galoi mung sadi maja na jai lang ra na hte, shinggan de pru hkawm shagu wan pat kau da na n malap na hte shana yup ten ni hta dai zawn phone wan bang na n jailang na matu, buwa wan company maga de na tsun sadi jaw da ai lam ni nga ai hpe chye lu ai.
Myithprap wan shakap ai ten hta mung, ngang kang hkrak ai wan sumri ni hpe shakap na hte hkam dahka jaw lu ai wan rai kaja ni hpe shakap na matu mung, hpaji jaw tsun da ai re.
Myitkyina muklum kata hta ya na zawn myihprap wan ni hkan na nta wan jahkring hkring hkru ai mabyin law malawng gaw, wan sumri n kaja ai, manu yawm ai ni hpe jai lang ai majaw, re lam tsun madi madun da ai re.
January 15 ya shani hta sha mung, Myitkyina Shatapru lawk na nta langai hte gat seng langai, myihprap wan a majaw, wan hkru hten ai mabyin nga lai wa sai re.
