Mali Nmai Wa Lawng, Njang Yang ginra hta shata mi daram pat da ai hpaji jawng ni bai hpaw sharin lu na lam hte seng nna KIO asuya hte hkrum jahta bawng ban taw nga ai lam ginra masha ni tsun ai re.
December praw hta, Njang yang ginra na Myen hpyen dap ni yawng pru mat wa ai hpang, Asuya rung ni yawng mung dawm lawm mat wa ai hta, Jawng sara, sarama ni yawng mung hkan pru mat wa ai majaw, jawng ni yawng hpe pat kau ra ai rai nga ai.
“Jawng lawan bai lu hpaw sharin na matu bawng ban jahkrup taw nga ai, gara hku rai wa na ngu ai hpe gaw grai n chye lu shi ai, dai ning laning mi laman gaw mi sharin ai ladat hte shangut mayu ai, dai majaw laika sasana galaw ai ni hte KIO ginjaw hpaji dap ni hte mung jahkrup bawng ban taw nga ai,” nga dai ginra na salang langai KNG de tsun dan wa ai re.
Myen jawng sara saranum ni yawng pru mat wa ai majaw, Njang Yang lahta tsang jawng, Nlaw yang lawu tsang jawng, Ngren yang lawu tsang jawng ni hpe pat da ai shata mi daram du wa sai rai nga ai.
Dai jawng ni hpe bai hpaw wa lu na lam hte seng nna KIO asuya hpaji magam dap hte, laika hpaji sasana galaw taw nga ai ni hte Njang Yang ginra masha ni hkrum jahta bawng ban taw nga ai re.
Njang yang ginrang, Tangbau yang hte Zupmai yang mare ni hta gaw, KIO asuya npu hpaji dap hte sharin taw ding yang rai nna, ya pat da ai jawng ni gaw, Myen asuya npu hpaw sharin taw nga ai jawng ni rai nga ai.