Danai mare kaba Kahtawlik hpyen yen dabang hta, Sin marang hkrat ai majaw, hpyen yen dum nta ni yawng baw hten ma ai lam, ginra masha ni kaw na chye lu ai.
December 13 ya shana, hking hkum mi daram marang si nhkring n-sa wa hkrat ru bun ai majaw hpyen yen dum n-ta hpri tsut ni yawng hten waw ma ai nga, Danai hpyen yen lithkam, KNG shiga dap de tsun ai re.
“Hpyen yen nta kanoi yawng ngu na ram hten mat ai, madung gaw hpri pa yawng baw mat ai rai nga ai, tsam mung tsam sai gaw, dai shana yupra yawng madi, mam n-gu loi li lu da ai ni yawng mung madi mat na tsawm ra jam jau kau ga ai,” nga tsun dan ai re.
Sin marang hte waw mat ai Hpyenyen dum nta ni hpe lawan bai gram galai la lu na matu, garum ningtum ra taw nga ai lam ndai zawn matut tsun dan ai re.
“Ndai ten yawng yak taw nga ai aten re ga rai nga ai, gun rai manu yawng tsaw rawt taw ai majaw, hpyen yen ni hkrai galai la lu na a tsam bai n nga, garum ningtum ra ahkyak taw nga ai ga rai nga ai,” nga matut tsun dan wa ai re.
Ya ten Hpyen yen mung shawa ni dai waw mat ai, nta kata mai byin ai hku kashung ta hpe lai di taw nga ai rai nna, dai nta ni lawan bai lu gram la na matu ra ahkyak taw nga ai rai nga ai.
Dai hpyen yen mung shawa ni gaw, lai wa sai 2018 ning kaw na hprawng yen pru wa ai hpyen yen mung shawa ni re lam chye lu ai.
Myen hpyen dap daru magam zing kau ai hpang, Myen mungdan kata hpyen yen mung shawa grau grau law jat taw wa nga nna, mungkan garum ningtum lam ni mung lani hte lani grau grau yawm wa taw nga ai mung rai nga ai.
