Mungmyit Sinli, Muse – Lashio lam kaba n tsa, Nam Um hte Humung lapran na Man Hawng mare hta, Myen hpyen dap Holicopter nbungli hte wa htim gap gasat taw nga ai lam chye lu ai.
Man Hawng mare kaw dap jung nga ai TNLA Balawng dap ni lai sa lai wa mawdaw ni hpe hkawn kang hta sha taw nga ai hpe Myen hpyen dap ni July 24 ya shana hkying 11 daram aten, sa htim gap gasat ai kaw nna, majan laja lana byin hpang wa ai re lam, dai ginra na mung shawa ni KNG shiga dap de tsun dan ai re.
“Ya Nam Um mare makau grup yin hta, Balawng dap ni shara masum ram kaw shara jahkrat nga taw ai, Myen hpyen dap ni Nbungli hte wa gap da nna, laknak kaba ni ya ten du hkra matut gap nga ding yang re.” nga tsun ai re.
Dai zawn majan byin ai shara de, Namhpakka Myen hpyen dap Hk-L-Y (123) dap hte 105 Mile Myen hpyen dap ni kaw nna laknak kaba ding yang gap shadam bun taw ai lam chye lu ai.
Dai zawn laknak kaba gap shadam bun ai majaw, Manhawng mare na dum nta 1, Nam Um mare na dum nta 1 hte Nam Um gat kata na gat seng nkau hkra hten mat ai lam chye lu ai.
Ya ten Namum mare makau na Kawng Win mung mare masha n kau Nam Um mare Nawku Jawng wang hta hprawng shingbyi nga ai rai nna, n kau Muse muklum de hprawng yen ma ai lam chye lu ai.
Lai wa sai July 23 ya shani hta mung, Muse Namhkam lam lapran Je Lan mare makau hta Myoma Pyithutsit hte Balawng TNLA dap ni gap gasat hkat wa nna, Pyithutsit maga marai 2 si hkrum wa ai lam chye lu ai.
Dai ginra hta Balawng dap ni kaw na, mawdaw lam kaba de wang lu wang lang pru nna, hkawn kang hta wa ai lam ni a majaw, ya na zawn laja lana gap gasat hkat wa ai rai nga ai.
