Namsan Yang mare kata hta Myen hpyen dap ni July 21 ya shana hkying 10 chyen daram aten, Jet Fighter nbungli 3 hte bawm wa jahkrat bun wa ai lam chye lu ai.
Wunpawng Mungdan Shanglawt Hpyendap KIA dap kaw nna Myen hpyen dap ni nga ai shara hpe drone hte bawm sa jahkrat bun ai hta, Myen hpyen dap maga sum machyi lam law wa ai majaw, nbungli hte bai sa gap bun wa ai re nga, shawng lam hpyen shi sawk ni tsun ai kaw na chye lu ai.
Myen hpyen dap ni nbung li bawm wa jahkrat bun ai hta, Nam San Yang mare ga-ang Kahtawlik Nawku Jawng shawng mayan hta wa hkrat ai re lam chye lu ai.
nbung li bawm a majaw, Nta n kau hten mat nna, dumsu nga 2 si ai re lam, shawng lam hta du nga ai magam gun ni tsun ai re.
“Masha hkra hkala ai lam gaw hpa n nga ai, Nta lahkawng masum hte Nam San Yang mare Uphkang rung hten mat ai. Ngut na Nga Dumsu 2 si ai dai re ga rai nga ai.” nga tsun dan ai re.
Myen hpyen dap ni Namsan Yang Mare mare hpe bawm wa jahkrat bun ai n dai kalang hte rai yang, lahkawng lang du sai rai nna, lai wa sai July praw 8 hta mung kalang wa jahkrat bun wa sai re.
Namsan Yang majan n htoi 20 ya na wa sai ten, lahkawng maga dap laknak kaba ni ding yang gap bun hkat nga ai rai nna, dai majan hta Myen hpyen dap maga ram ram sum machyi taw sai re lam chye lu ai.
