Waimaw, AungMyayThit mare na, U Shwe Min woi awn ai Pyithutsit shagyit hku nna lai wa ai Sam ramma la kasha 3 hkan gap hkrum ai majaw, marai 1 hkala sawng ai lam chye lu ai.
July 23 ya shana hkying 7 daram aten, ShweNyaungPin hta nga ai, Sam ramma marai 3 gaw, sengke hte Waimaw maga sa wa ai ten, AwngMyaThit Pyithutsit gate shara hta du ai ten, hkap gap hkrum ai re lam dai ginra na mung shawa ni KNG shiga de tsun dan ai re.
“Dai ramma 3 gaw, Waimaw de sa wa ai, Pyithutsit ni lam pat da ai kawa shagyit hpe sa gang hpaw nna, lai wa ai ten, Pyi Thu Tsit maga na gadai ni re rai nga marawn dat yang, dai ramma 3 hprawng mat ai kaw, hpang na hkan gap ai hta marai 1 hkala hkrum wa ai re.”
Dai hkap gap hkrum ai ramma marai 3 gaw, ShweNyaungPin lawk 3 hta nga ai ni re lam chye lu ai.
Waimaw ginra hta ya ten, laknak hpai wuhpung ni grau grau law wa ai hte, dai ni jahkrit shama re ai lam ni a majaw, Mung shawa ni shim lum lam hpe myit tsang wa taw nga ai re.
Pyithutsit dap ni kaw nna dai zawn mare ga ang hta, shagyit jahkrat nna, lai sa lai wa mung mare masha ni hpe jahkrit shagyen ai lam ni, mawdaw ni hkan na gumhpraw hta sha taw ai ni a majaw, mung shawa ni a matu hkawm sa hkawm wa lam hta yak hkak dut dang ai lam ni byin taw ai hpe chye lu ai.
