Sezin mare kata, Myen hpyen dap ni matut dap jung da majaw, mare masha 400 jan matut hprawng yen ra
Nawng Lut Ginwang, Sezin mare majan a majaw, Hpakan mare kahtawng hkan, dumbru dumbra hprawng yen hkawm taw nga ai Sezin hpyen yen ni marai 400 jan gaw, mare kata Myen hpyen dap ni matut dap jung shara jahkrat nga taw ai majaw, tinang mare buga de bai n htang wa na hkrit tsang ra nna, yak hkak hkrum nga ai lam chye lu ai.
Lai wa sai July 18 ya shani kaw na, Sezin mare kaw Myen hpyen dap hte Wunpawng Mungdan Shawnglawt Hpyen Dap KIA lapran, laja lana gap gasat hkat wa ai majaw, Hpakan Tamahkan, Hawng Pa hte Nat Hka Htung mare ni hkan hprawng yen nga ai lam Sezin mare masha ni kawn chye lu ai.
Hpyen yen mung shawa langai tsun ai gaw, “Anhte hpyen yen ni gaw July 21 ya shani kaw na hprawng yen pru wa ai, dai ni nga yang n htoi 10 ya jan sai. Ndai laman mare maga de gap hkat ai lam n nga, majan zim taw ai rai tim, mare kata myen hpyen dap ni naw nga ai majaw, an hte n-gwi wa ai. Mare kata hta nga ai mung shawa ni hpe mung gara de n sa shangun ai nga tsun ai. Myen hpyen dap ni shan hte mare kata na yawng pru mat ai hpang she anhte bai n htang wa na re.”
KIA hte PDF maga de na mung mare de rai n wa shi na lam tsun sadi jaw da nna, mare de bai n htang wa ai ni nga ai rai tim, mare de n shang shangun ai sha bai nhtang kau shangun taw lam matut chye lu ai.
Ya ten, Tamahkan KBC nawku jawng wang hta marai 49, AG Nawku jawng wang hta marai 21, Ma shalet jawng wang hta 165, Nat Hkahtung mare na hpungkyi jawng hta marai 60, Hawng Pa mare na hpungkyi jawng hta 100 jan hte jinghku jing yu n ta hkan 50 jan rai nna shingbyi nga ai lam chye lu ai.
Matut nna mung, hprawng koi yen nga dingyang re majaw, hpyen yen jahpan jat nga dingyang rai nna, dep hkap ai hku lahkawn lamawn hte garum jaw ya taw ai raitim, aten galu na wa yang, garum ningtum mung ra ahkyak taw ai lam tsun ai re.
Sezin mare hta masha jahpan 2000 jan nga ai rai nna, ya ten dai mare hta nga ai mung shawa marai 1000 jan hpe Myen hpyen dap ni kaw na gara de mung n pru shangun ai lam dai ginra na mung shawa ni matut tsun wa ai.
