Dai hpawt manap jau kaw na Myen Hpyen dap ni Manmaw hpe n-gun kaba hte bai htim gasat wa nna, majan laja lana gasat poi byin nga ai lam, shawng lam hpyen magam gun ni kaw na chye lu ai.
Dai hpawt manap Myi rai n mu shi ai ten kaw na Myen hpyen nbungli 5/6 hte bawm wa sharu bun nna, laknak kaba laja lana gap sharu bun nna, Manmaw hpe htim gasat taw nga ai lam shawng lam hpyen magam gun hte ni nawn ai Salang langai KNG de n dai zawn tsun dan wa ai re.
“Manmaw de Myen ni agying nut taw nga ma da. Dai hpot yup pyi n rawt shi ai kaw na. Nbungli mung aging sa gap. kaduk kaw rawng nga tim pyi yawng kanan kadu ai she nga ai,” nga tsun dan ai re.
Dai hpawt madung htim gasat ai shara ni gaw, Manmaw Deng 3 maga de rai nna, Nam Hpa Nawng hte Manmaw Dakkasu Jawng shara ni de re lam chye lu ai.
Manmaw majan 2 ning du wa ai ten, Myen Hpyen maga, laja dik ai hku htim gasat ai gaw, ndai kalang sawng dik re lam, shawng lam hpyen magam gun hte matut mahkai nga ai Salang wa matut tsun dan ai re.
Gumshem Myen Hpyen Dap Simsa lam NCA myithkrum ta masat htu ai 11 ning hpring n htoi hpawng lamang galaw nga ai ten, Manmaw hpe laja lana n-gun kaba hte htim gasat wa ai lam mung rai nga ai.
Myen hpyen maga lai wa sai bat hta Nam Hpa Nawng maga de htim gasat wa ai hta, sum machyi law nna, Deng 3 Nawku Jawng hpe Wan nat jahten kau ya ai mabyin lam ni nga lai wa sai re.
Myen hpyen maga laja lana htim gasat wa ai majaw, Manmaw shawnglam hpyen mam kaw tsap taw nga ai magam gun ni a matu ja ja akyu hpyi myit dum ya na matu shawng lam hpyen magam gun ni tsun shana wa ai hpe matut chye lu ai.
