Mungmyit Mare kaw Mani hpawt numdaw (2) lang gasat poi byin wa ai nga ginra mung shawa ni tsun shana wa ai re.
Mani hpawt hkying 4 chyen kaw numdaw kalang, jahpawt hkying 9 kaw numdaw kalang, lahkawng lang gap gasat hkat wa ai lam ginra mung shawa langai KNG shiga dap de ndai zawn tsun dan wa ai re.
“Mani Hpawt Jau kaw numdaw lahkawng lang gasat poi byin ai, dai ni gaw bai zim taw nga ai, Nbungli Y12 gaw shani shagu pyen ai. Mung shawa ni gaw nbungli nsen ngoi ai na jang gaduk rawng rai nga ga ai,” nga tsun ai re.
Ndai laman Myen hpyen ni Myitsone Mabeing lung wa lam maga de htu shadut taw nga ai majaw, KIA hte pawng hpawm maga hkap shingla gasat ai majaw, majan shani shagu ngu na ram byin nga ai re.
Mungmyit mare gaw lai wa sai ten Balawng TNLA ni htim gasat zing madu wa ai ginra langai rai nna, makau grup yin shara nkau hkan TNLA dap shara nkau mung nga ai lam chye lu ai.
Ya ten Mungmyit mare makau grup yin, hpyen masa matut shaja hkat nga ding yang re majaw, majan matut manoi naw laja na masa nga ai lam ginra masha ni tsun maram nga ma ai re.
Mungmyit mare hpyen yen mung shawa ni, nam de hprawng yen ai n htoi na wa ai majaw, lam shagu yak hkak ai lam ni law wa ai nga ginra hpyen yen mung shawa ni tsun dan ai re.
