Wunpawng Mungdan Shanglawt Hpyendap KIA hte Pawng hpawm dap ni dai hpawt manap jau kaw na, Manmaw hpe ninggam sharawt htim gasat taw nga ai lam, shawng lam hpyen magam gun ni kaw na chye lu ai.
Dai hpawt manap jau hkying 4 aten daram kaw na, KIA hte pawng hpawm maga, Myen hpyen dap shara ni hpe bai htim gasat taw nga ai re lam shawng lam hpyen magam gun langai KNG de tsun ai re.
“𝑫𝒂𝒊 𝒉𝒑𝒂𝒘𝒕 𝒌𝒂𝒘 𝒏𝒂 𝒋𝒂𝒋𝒊 𝒃𝒂𝒊 𝒏𝒖𝒕 𝒉𝒑𝒂𝒏𝒈 𝒏𝒈𝒂 𝒔𝒂𝒊, 𝒌𝒚𝒖𝒉𝒑𝒚𝒊 𝒈𝒂𝒓𝒖𝒎 𝒎𝒖” nga tsun ai re.
Manmaw Muklum htim shagrawt majan hpe lai wa sai 2024 December praw 4 ya jahpawt kaw na htim gasat hpang wa ai, dai ni ten du hkra majan byin nga ai lam mung rai nga ai.
Lai wa sai September praw kaw Myen hpyen hka sanghpaw 7 du ai hpang, Myen ni KIA ni nga ai maga de htim gasat wa ai majaw, KIA hte pawng maga dap shara nkau bai yen da ra mat ai re.
Myen hpyen maga bai htim gasat wa ai majaw, Manmaw Nmawk Deng 2, Deng 3 hte Nam Hpa maga na dap shara nkau hpe tat kau ya ra mat ai mung rai nga ai.
Ya dai hpawt manap kaw na gaw, KIA maga na bai htim gasat nga sai lam, shawng lam magam gun hte matut mahkai nga ai Salang langai KNG de ndai zawn tsun dan wa ai re.
“𝑫𝒂𝒊 𝒉𝒑𝒂𝒘𝒕 𝒎𝒂𝒏𝒂𝒑 𝒌𝒂𝒘 𝒏𝒂 𝒈𝒂𝒘, 𝒂𝒏𝒉𝒕𝒆 𝒎𝒂𝒈𝒂 𝒏𝒂 𝒃𝒂𝒊 𝒔𝒉𝒂𝒌𝒓𝒊 𝒉𝒑𝒂𝒏𝒈 𝒏𝒈𝒂 𝒔𝒂𝒊, 𝒈𝒂𝒓𝒂 𝒉𝒌𝒖 𝒓𝒂𝒊 𝒘𝒂 𝒌𝒖𝒏?” nga tsun ai.
Dai hpawt manap jau kaw na gaw, Manmaw hpe wang shinggrup tawn ai pawng hpawm dap hpyen man 7 hku na, Myen hpyen dap shara ni hpe bai htim gasat taw nga sai rai nga ai.
Ya ten Manmaw hpe Pawng hpawm maga htim gasat taw ai majaw, Myen hpyen maga nbungli hpan hkum kaw na, bawm wa jahkrat bun nga ai lam matut chye lu ai.
