Sadung ginra, N wan Kawng mare hta, August 2 ya shani kaw nna, Myen hpyendap pawng hpawm Pyihtusit hpung hte Wunpawng Mungdan Shanglawt Hpyendap (KIA) lapran majan laja wa ai majaw, ginra masha ni, nam kata de hprawng yen ai kaw na, Sadung buga Hkalup hpung nawku jawng wang de du nga sai lam chye lu ai.
N ta hpe n gwi kabai da ai majaw, nam kata kaw shawng hprawng yen wa sai raitim, majan n hpan matut laja wa na masa naw nga ai majaw, August 3 ya jahpawt, buga hpung de hprawng yen shingbyi ra mat ai re lam, hpyen yen shawa langai, Jinghpaw Shiga Dap KNG de lawu na zawn tsun wa ai.
“Ya gaw dai kaw, mani na shawng shani, lai wa sai bat kaw na, atsawm sha shara sa la, sa hkyem rai na mani kaw na gaw sanat ngoi rai na, shanhte (KIA) sa dung ra ai, sa zing da rai, lam kaw mung yawng shara sa la da rai, dai hku byin jang she, ya dai kaw gaw jarit sin mung nga ai, pyihtusit mung hpan 2, 3 nga ai. Dai kaw myen hpyendap the KIA mung nga ai, lak nak hpai ni 3, 4 ram nga ai. dai majaw dai makau, lam lapran kaw nga ai anhte mung masha ni gaw gara de mung n lu hprawng na masa rai wa ai. Ya tau nau na lapran hprawng da ka re, mani lani mi kaw mare shingnawm kaw lagu nga na, dai hpawt gaw shalai dat sai ka rai nga ai.”
Ya ten, ndai hpyen yen ni a matu garum katum ni mung ra ahkyak taw ai lam mung chye lu ai.
Hpyen yen yawng htinggaw 30, yawng marai 100 ram gaw, Sadung mare kata hprawng koi yen lu wa sai raitim, mare kata dum n ta, u, wa, yam nga sin ai mare masha n kau naw ngam kau da ai lam tsun ai re.
August praw 2 ya jahpawt, N wawn kawng e nga ai U shwe Min Pyihtusit hpung hpe KIA dung 3 ni sa htim gasat zing ai hta sinat pala n kau hpe padang dip zing la lu ai lam shawng lam hpyen shi sawk ni kawn chye lu ai.
Dai ginra de hpyen n gun jat lung wa ai, Myen hpyen dap hte Pyi Thu Tsit pawng hpawm hpyen n gun 60 ram hpe mung, Wunpawng Mungdan Shanglawt Hpyendap KIA ni, lam lapran hkap shing la gasat adat ai hta sum machyi nna, bai hting nut mat ai lam chye lu ai.
Ya ten dai shara ni hta KIA kaw na dap jung shara la da sai raitim, Myen hpyen dap hte Pyithusit n gun jat nga dingyang re majaw, majan n hpan matut laja wa na masa nga ai lam sagawn chye lu ai.
