Myen Hpyen dap saw shaga ai Simsa lam bawngban hpawng hpe Naypyidaw kaw galaw na n mai byin ai lam KIO maga laika hte bai htang shana ai lam nga ai hpe chye lu ai.
Myen Hpyen Dap maga Wunpawng Mungdan Shanglawt Asuya KIO hpe Simsa lam bawngban na matu September praw 4 ya shani laika hte saw shaga wa ai re.
Myen hpyen maga saw shaga ai simsa lam hkrum bawngban hpawng hpe KIO maga Naypyidaw kaw hkrum jahta ai lam n galaw ai sha, Miwa mung Shweli Zawn re ai kaw hkrum bawngban na matu htang shana ai lam Naypyidaw hte ni nawn ai BBC shiga hta tsun da ai re.
Myen Hpyen Dap saw shaga ai simsa lam hkrum bawng hpawng hpe wanglu wanglang hkrum bawngban mai na hte Mungdan kata kaw hkrum bawngban mat wa na ngu ai lawng lam hpe masat jahkrat da ai lam chye lu ai.
Ya na zawn KIO hpyi shawn wa ai hpe Myen hpyen maga na gaw, Miwa mung Shweli de du hkra sa du hkrum bawngban mayu ai masa n mu ai lam, n dai masa hpe chye ai ni BBC shiga lawk hta tsun da ai re.
KIO maga na gaw, Myen Hpyen Asuya hpang de laika hte bai n htang shana da ai lam nga ai rai tim, Myen hpyen maga na bai n htang shana ai lam nga, n nga hpe gaw a tsawm n chye ai nga Dukaba Naw Bu BBC Shiga kaw htai tawn ai re.
KIO maga Miwa mung kaw hkrum na matu tsun tawn ai rai tim, Miwa hte KIO hkrum jahta sai lam nga n nga hpe gaw a tsawm tup hkrak rai n chye lu shi ai nga Dukaba Naw Bu matut tsun da ai re.
Gumshem Myen hpyen Asuya Ningbaw Min Aun Hlaing Gumsan magam hpyi dagraw la ngut ai hpang, shata kru bungli masing hta simsa lam bawngban na ngu ai bungli masing kaba langai mung lawm nga ai re.
Ndai shata kru laman KIO hpe simsa lam bawngban na matu, shawng ningnan lang saw shaga wa ai rai nga ai.
KIO gaw, NUG CRPH ni hte hpaw gumhpawn da ai, SCEF ngu ai wuhpung hta shang lawm wuhpung langai mung rai nga ai.
KIO maga hku na gaw Mungdan ting gap hkat jahkring ai rai yang chyu sha simsa lam bawngban ai kaw shang lawm na ngu ai Policy hpe jum manat wa ai mung rai nga ai.
Dai policy a majaw, KIO gaw NCA Ta masat htu ai kaw n shang lawm wa ai mung rai nga ai.
Myen hpyen maga simsa lam hkrum bawngban na matu saw shaga taw ai rai tim Manmaw majan gaw nsim n sa matut gap gasat hkat nga ding yang rai nga ai.
Naypyidaw Muklum kata NCA 11 ning hpring poi lamang kaba hpe hpawt ni October 15 ya shani galaw na matu hkyen shajin taw nga sai lam hpe chye lu ai.
Dai poi lamang hta Jinghpaw mung na Salang nkau sa du shang lawm ai lam nga ai rai nna, Miwa Communic Party Matsun du daju mung dai poi kaw sa du shang lawm mat na re lam chye lu ai.
