Putau ginra hpyen masa gahtet ai majaw, dum nta nhtang wa sai mung shawa ni myit tsang

Hpyen yen taw ai kaw nna, simsa lam akyu galaw hpung ni a garum la ai hte, dum nta wa taw nga ai, Putao hpyen ni, mani kaw nna, hpyen masa bai shaja wa ai majaw, kalang bai hprawng ra na myit tsang nga ma ai re.

Sumpyiyang ginra, Tangja Yang mare makau kaw, mani April 3 ya shani Myenhpyen dap n gun 80 jan hte Wunpawng Mungdan Shanglawt Hpyendap KIA lapran, hpyen masa gahtet wa ai majaw hkrit tsang nga ai re lam, ginra masha langai KNG shiga dap de ya na zawn tsun ai re.

“Mana maga de shanglawt ni nga ai de Myen ni kaw nna, kalang hkawng lang gaw gap sam ai law. sanat kaba lahkawng lang ram sha na ai law.”

Aten shata mi daram sanat mahku zim sai majaw, Simsa lam akyu galaw hpung PCG, Wunpawng amyu sha mungbawng rap daw WMR hte Myitkyina Christian Council MCC kawn lapran salang tai jahkrup ya ai hte Putao hpyenyen mung shawa yawng dum n ta wa lu hkra garum ya taw ai rai nga ai.

Dai hta, Sumpyi yang, Lungsha yang, N si yang, Tangja yang ginra hkan na mung shawa ni, hpyen yen ai kaw na, law malawng dum n ta bai wa htawt taw nga ten, Myen hpyen dap  shamu shamawt ai majaw shim lam naw n nga shi ai nga nna, putao ginra masha langai ya na zawn matut tsun ai re.

“Grai gaw tsang ai, zim na lam n nga majaw, yen shara dingyang tam ra ai ka rai nga ai, ya ten gaw gara de ma n sa shi ai, buga hpung hkan na mung mare kaw sha ng ana hku tsun tawn ai, sanat ngoi wa jang gaw tinang n ta tinang nga ai hta yawng rau chyawm ng ana hku, mani mana sha myen ni bai mare de bai du re majaw, yawng shing gan n le ai sha chyawm chyawm rai na nga na hku, yawng sadi na hku gaw n dai ram madang naw nga taw ai.”

Putao kaw nna, Hkak ma mare du hkra sha dung ai Myen hpyen dap gaw ya ten, Lungsha yang mare du hkra shara la tawn ai zawn, mare kata Naw ku jawng wang hkan, mare shing gan, nam grup byin, shara shagu shara la, shamu shamawt hkawm taw ai majaw, majan bai laja wa na masa nga taw ai lam ginra masha ni tsun ai re.

Ya ten myen hpyen dap kawn, Tangja mare grup yin nga ai shanglawt hpyen hpung hpe jasan kau mayu ai masing hte hpyen n gun dingyang htu shadut taw ai lam ginra masha langai gaw shi a ningmu hpe ya na zawn tsun ai re.

 “Ya na mung masa lapran tinang lamu ga tinang mungdan lu la hkra ngu ai masing kaba hku galaw ai rai yang gaw, shanhte matut galaw na mung n gun jaw na rai nga ai, raitim mung kaja wa ta tut htum hkra, awng dang hkra galaw na lam n rai na, Sumpyi yang hkan na zawn, mung masha ni dai zawn hprawng dat yen dat rai na madang sha rai jang gaw mung masha ni gaw tsep kawp sanat mahku n shangoi na hpe gaw ra ai ga rai nga. Raitimung ta tut yawng galaw na nga jang chyawm, yawng gaw laning mi sha gaw jam jau hkam na, n gun jaw na nga nna tsun ai ni mung nga ai. Raitim ya yang gaw bai wa na, n ta du sai, n dai Myen ni gaw bai htu shanut nga rai jang gaw byin wa na lam gaw naw nga ai ka rai nga, dai zawn re kaw malawng maga gaw grai hkrit tsang ai yak taw ai ka rai nga ai.”

Dai sha n ga, Seng ang ai salang ni kawn woi awn ai hte n dai April praw 5 ya hta mung Myitkyina mare kaba hkan nga ai Hpyenyen yawng dum n ta wa na hku hkyen tawn ai re.

Lai wa sai February shata praw kaw nna, putao ginra hta Myanhpyen dap hte Wunpawng Mungdan Shanglawt Hpyendap KIA, PDF lapran majan laja lana byin ai hpang march praw kaw nna KIA maga hting nut mat ai rai nga ai.