Munggu ginwang, Puwang Man Hka mare hta, Myen hpyen dap ni gap dat ai lak nak kaba si wa hkrat ai majaw, asak 9 ning re ma la kasha si mat ai rai nna, kanu gaw hkala hkrum sai re.
Sakhkung hka sinpraw hkran Lau Gai maga de na, Myen hpyendap ni September 27 ya shana laknak kaba gap bun dat ai gaw Pu Wang Man Hka mare na Slg. Tang Gun a dum nta hta wa hkrat ai re.
Laknak si a majaw madu jan Labang Roi gaw hkala ai rai nna, asak 9 ning re kasha Ma Bung gaw September 28 ya, mana de maga asak si sum mat sai lam chye lu ai re.
Covid-19 pat shing dang ai lam hte, hpyen masa shuk ai majaw, tsi rung aten dep nlu sa nna nnga mat ai re lam dum nta masha ni hte chye hkat ai ginra masha langai tsun dan ai re.
Lahta Sammung, Munggu, Bangsai ginra ni hta lai wa sai July shata kaw nna Myen hpyendap hte Kokang MNDAA lapran majan laja lana byin ai majaw, mung shawa 2000 jan gaw hpyen hprawng nga ra ai re.
Dai hta nkau gaw hpyen yen dabang hta covid-19 ana zinli bai kahtap hkrum sha ai majaw, garum ntum grai ra ahkyak nga ai lam hpyen yen lit hkam ni kaw nna chye lu ai.
