Lido Lam Mayan Majan Ding Yang Byin Taw Nga

Hugawng Pa, Lido lam n tsa, Ting Kawk mare hte Kawng Ra mare lapran hta, dai hpawt hkying 11 daram aten e, Myen hpyendap hte Wunpawng Mungdan Shanglawt Hpyen dap KIA lapran gasat poi byin ai lam chye lu ai.

Mogaung kaw nna malu masha htaw lung wa na hpyen hpung hpe shim lam la ya na matu, Danai maga de na yu wa ai Myen hpyen hpung hpe lam lapran e KIA kaw nna hkap gasat ai re lam, Ting Kawk mare masha langai KNG shiga dap de tsun dan ai re.

Dai hpawt lahkawng maga hkying hkum mi chyen daram gap hkat ai lam hta, Myen hpyen dap maga na sinat kaji kaba ni hte hkrup mara gap shadam bun lai wa sai lam, ginra masha ni tsun dan ai re.

Ya ten Ting Kawk hte Kawng Ra mare lapran shara ni hta, dap lahkawng maga shada maja hkat ai masa hta nga ai rai nna, Mogaung maga de na lai lung wa ai Myen hpyen maw daw ni Danai mare de du shang wa ai yang, majan grau laja lana byin wa mai ai lam, ginra masha ni tsun maram nga ai re.

Myen hpyen maw daw 40 daram Mugar magap nna mani September 28 ya jahpawt Mogaung kaw nna Danai lam de lai lung wa ai rai nna, lam lapran gap hkat ai lam loi loi byin nga ai hpe chye lu ai.

Bai nna, September 28 ya shana de maga Dum Bung mare kaw nna Lawa maga de seng kye hte wa ai mung shawa 2 hpe Sai Ling Hka mahkrai pawt e dap jung ai Myen hpyendap ni sinat hkan gap ai majaw, marai langai si nna, marai langai rim hkrum ai lam chye lu ai re.

Read Previous

Myen hpyendap lak nak si hkra nna, a sak 9 ning re ma kasha nnga mat

Read Next

Myen hpyendap Hte KIA Shara 2 Hta Majan Byin

Leave a Reply

Your email address will not be published. Required fields are marked *