KBC ningbaw Rev.Dr. Hkalam Samson hpe ahkyak la na matu Myen hpyendap tara jewat da
American Gumsan magam Slg. Donald Trump hte hkrum shaga ai Jinghpaw Wunpawng Hkalup Hpung Ginjaw KBC ningbaw Rev.Dr. Hkalam Samson hpe ahkyak la na matu Myen hpyendu langai kaw nna tara jewat da ai lam chye lu ai.
Myen hpyendap dingdung daw daju M.P.Hk na Dukaba Than Htike, Myitkyina ginwang tara rung hta August 26 ya shani tara jewat da ai re.
Facebook ntsa bra nga ai laika hta ‘July 18 ya shani American gumsan magam Slg. Donald Trump hte hkrum ai shaloi tsun ai ga si ni hpe World News Now facebook hta shapoi da ai hpe mu ai majaw ahkyak la ya na matu’ nga nna shawk da ai hpe mu lu ai.
Mungkan mungdan 17 na tsin yam hkrum sha ai makam masham ningbaw marai 27 hte American Gumsan magam Donald Trump hkrum ai ten, ‘Myen hpyendap gaw Myen mung kata hkristan ni hpe roi rip zingri ai lam’ Sara Kaba Rev.Dr. Hkalam Samson tsun mat wa ai re.
Ndai tara jewat da ai lam hte seng nna matut jep gying, n jep gying hpe September praw 9 ya shani she mahtai chye lu na re lam mu lu ai.
