Tag Archives: Muse

Myen hpyendap ni Mungshawa nga ai mare de laknak kaba gap bang

Mungmyit Sinli Ga, Muse lahta Mungbaw, Wing Seng mare hta Myen hpyen dap ni n dai laman shana shagu laknak kaba gap shadam bun ai majaw, ginra masha ni hkrit tsang taw ai lam chye lu ai.

November 21 ya shana, Wing Seng Sama kawng kaw na gap dat ai laknak kaba si gaw Hka Nan lawk na maran n ta wa hkrak hkra ai majaw, dum nta masha ni hkala hkrum wa ai lam chye lu ai.

“Myen hpyen dap ni n dai lahkawng masum ya shana shagu laknak kaba gap shadam ma ai, Ying La Bum kaw na mung, Sama bum kaw na mung gap shadam dat dat rai ma ai, mana gap dat ai laknak kaba si langai Hkanan lawk na Maran n ta wa hkrat ai, n ta mung hten nna, Maran ding gai mung hkala hkrum ai, dai zawn laknak kaba hkrai gap shadam bun na anhte mung shawa ni hkrit na pyi n lu yup ai” nga tsun dan ai re.

Dai ginra hta Myen hpyen dap ni shamu shamawt ai lam grai wa n nga ai raitim, bum kaw na laknak kaba gap bun bun re lam ni ding yang byin taw ai lam chye lu ai.

Ya ten dai ginra hta, Myen hpyen dap hte KIA, MNDAA dap ni lapran hpyen masa yu maram hkat taw ai rai nna, lai wa sai bat hta mung, Mungbaw Mai Hpang Mare hta majan byin wa sai re.

Muse ginra Myen Hpyendap Laknak Gap Bun ai majaw, Mungshawa ni Si Hkala hkrum

Munggu kaw nna yu wa ai Myen hpyen hpung ni hpe Dingdung daw pawng hpawm dap ni, lam lapran bawm hte hkap shing la gasat dat ai hpang, Myen hpyen dap ni makau grup yin de laknak gap shadam bun ai majaw, mung mare masha langai si nna, langai hkala hkrum wa ai lam chye lu ai.

Dai na maga de hkying 1 chyen daram aten, dap shara galai na matu Munggu kaw na yu wa ai hpyen hpung ni hpe, Muse 105 mile kaw nna Chyin San Chyaw maga de yu wa ai lam lapran hta bawm the hkap gasat ai hpang, Myen hpyen dap ni gap shadam bun ai laknak a majaw, mawdaw gram taw ai mung shawa langai si nna, langai hkala hkrum wa ai lam mung rai nga ai.

Dai zawn hkap shing la gasat ai hta Myen hpyen dap maga de na sum machyi si hkala ai lam hpe a tsawm tup hkrak n chye lu shi ai re.

Dai hkala hkrum ai Mung shawa gaw ya ten, Muse mung shawa tsi rung hta tsi tsi hkam la taw ai lam chye lu ai.

Dai ginra mayan ni hta Myen hpyen dap, Pyi Thu Tsit dap, hte rawt malan hpung ni rai nga ai KIA, SSPP, TNLA, MNDAA dap hte PDF ni ding yang shamu shamawt taw ai shara mung rai nga ai re.

Howa Bum kaw Myen hte KIA gap hkat

Lahta Sammung Muse ginwang Howa Bum kaw Myen hpyendap Dapnu (88) hte Wunpawng Mungdan Shanglawt Hpyendap, KIA Dapdung 36 ni, Sep. 24, bat Mali Ya shani, shana ten du hkra, gap hkat ai lam, ginra masha ni tsun ai.

KIA Dung 36 dap daju de Myen hpyen tat-ma 88 hpyen hpung ni ginra jasan majan baw ai majaw shana hkying 8 du hkra wuhpung lahkawng gasat gala lam byin nna, laknak kaba nsan ni na lu ai lam, ginra masha ni tsun  ai.

“Shani ga-ang hkying 4 minit 20 daram kaw nna KIA Dung (36) Howa Bum kaw ya bai gap hkat bang taw nga sai law.  Shanhte tat-ma 88 ni wa gap ai. Howa Bum, Dung 36 kaw Myen dung mat sai.  Ya ten du hkra naw kapok kapawk gap hkat taw nga ai” nga nna, shana hkying 8 ten, ginra masha langai Jinghpaw Shiga Dap, KNG de tsun ai.

KIA Dapba (6) kata Dapdung (36) ginra Muse ginwang, Kyukok (Pangsai) ginra hta tatmadaw dapnu (88) hte dapnu (99) hpyen hpung ni ginra jasan majan masing galaw ai majaw ndai shata Sep. 10 kaw nna gasat gala lam ni bai byin wa ai re lam, ginra masha hku chye lu ai.

Dai majan hpang shani hta, masha jahpan 300 hkawt nga ai Man Kawng kahtawng masha yawng gaw ni kahtep ai Man Pying mare de hpyen koi yen ra ai lam, Man Kawng mare salang wa KNG de shawng e tsun shana wa sai re.

Ndai shata htum, September 30 du hkra tinang dinghkrai majan jahkring da ten, Myen asuya dap tat-ma (88), tat-ma (99) hte tat-ma (22) hpyen hpung ni gaw ginra jasan majan masing hpe, grau nna Dingdung Daw Daphpawm hpung mali, KIA, Kokang MNDAA, Rahkai AA hte Balawng TNLA dap ni nga ai shara ni hta, gala nga ai re.

Asia World Company a Muse numshang shagyit hta bawm kapaw

Lahta Sammung, Asia World Company a Muse numshang shagyit hta May 11, bat Langai Ya shana hkying 6 jan ten, bawm kapaw ai lam byin wa sai.

Lam pat shadun tawn ai gumhpraw hta shagyit hta e bawm langai kapaw ai mabyin kaw masha si hkala nga n nga hte kadai kapaw ai re lam n chye lu shi ai.

“Kadai re ai gaw n chye ai.  Raitim shanhte (Asia World Company) dai kaw pyitusit ni ayan na pru-shang re ni hpe mung hkyamsa n jaw ma ai nga nna loi garu ma ai” nga nna mying n tsun mayu ai ginra masha langai tsun ai re.

Ndai Myen-Miwa jarit hpaga lam nmaw shagyit hta e pru-shang mawdaw shagu hpe gumhpraw hta sha ai rai nna Myen asuya balik dap, hpyendap hte pyitusit hpung ni mung hkap sin nga ai shara re.

Asia World Company a madu gaw Myen mung a kani hkawhkam, Miwa amyusha Slg. Lo Hsing Han a kasha, Slg. Htun Myint Naing snr Steven Law ngu nna mung chye ai, Slg. Lo Ping Zhong re.

Miwa gasat dap ni Myen mung jarit de lahkawng ya gawan lai

Lahta Sammung e Myen asuya dap hte Dingdung Daw Daphpawm hpung 3 lapran gasat gala majan laja nga ten, Miwa gasat dap ni Myen mung jarit mayan 2-ya gawan lai ai lam galaw wa sai re.

Miwa hpyendap tank mawdaw ni hte hpyenla ni gaw Myen-Miwa ga jarit mayan, Shweli, Jegau, Manwin hte Loije maga August 21 hte 22 ni hta gawan mat wa ai re.

Dingdung Daw Daphpawm malawm, Balawng TNLA, Rahkai AA hte Kokang MNDAA rawt malan hpung ni pawng nna, Myen hpyendap a Mandalay Tai na hpyen hpaji jawng (DSTA) hte Sammung, Nawng Cho na Guk Htik mahkrai kani nanghpam jep joi shagyit ni hpe August 15 ya shani maja shang gap gasat dat ai re. Dai hpang wuhpung dap lapran gasat gala majan ni gaw, madung Mandalay-Muse lam dingyang, Lashio, Sinli, Kutkai, hte Nampaka ginra ni hta byin nga ai re.

Ya na zawn Miwa hpyendap ni jairt mayan hpyen n-gun wa madun ai rai timung Lahta Sammung e gasat gala majan ni gaw dingyang naw byin shajang nga ai re.