Mungmyit Sinli, Muse ginwang, Dima Buga Hkalup Hpung na ramma marai 2 hpe Myen hpyen dap rim zingri sat kau ai hpang, moi mang hpe wan nat lup makoi da ai hpe ginra masha ni July 31 ya shani wa mu tam ai lam chye lu ai.
Dima buga hkalup hpung hta ap nawng nga ai ramma lahkawng gaw, July 25 ya shani Nam Um de sa nna, bai n htang wa ai ten, Myen hpyen dap rim la kau ai bat mi daram na ai hpang, July 31 ya shani wan nat lup makoi da ai hpe sa mu tam ai re nga, Dima ginra masha langai KNG shiga dap hpe tsun dan ai re.
“Shan yen hte rau laknak kaba si hkra na asak si sum ai Balawng la langai hpe mung, TNLA hpyen palawng jahpun da nna, langai hpe gaw Pyithutsit palawng jahpun da ai. dai zawn palawng jahpun na, Balawng hpyen la lu gap sat ai ngu hku na sumla gayet la ma ai. Shanhte na masa hpe yu yang rim mat wa ai hpang shani jang sat kau ai masa rai nga ai.” nga nna tsun dan ai re.
Ya sat hkrum ai yan lahkawng gaw, July 25 ya shani Nam Um de buga na arung arai sa htaw la na matu sa ai ten, Myen hpyen dap hte Balawng TNLA dap lapran majan laja lana gap gasat hkat nga ai ten hte hkrum ai majaw, dai Nam Um mare hta gan hkring nna, sinat mahku n sen loi zim ai majaw buga de bai n htang wa ai ten, Nam Um mare lai na Yukalip kawng hta hkap rim hkrum ai re lam chye lu ai.
Dai zawn rim hkrum ai hpang, Mung mare masha ni gaw Myen hpyen dap shagu de hkan san sagawn ai raitim, n chye ai ngu sha, bai tsun ning dang dat ai hpe chye lu ai.
“Anhte hte seng ang ai Myen hpyen dap yawng de hkan san ai, n chye ai nga hkrai hkap tsun ma ai. shanhte nat kau na lup da ai hpe yu yang, ndai lam hpe nchye hkra galaw ai re, anhte sakse hte hkrak mu ai lam gaw, dai rim hkrum ai langai Kuthkai Hkai rem jawng yu palawng hpe mu ai, langai gaw kyep htep hpe mu ai, dai sakse ni mu ai. Balawng hpyenla palawng jahpun da ai mung shawa hpe gaw dai hku sha lup da ai. Anhte ramma lahkawng hpe n ra sha lu la wa ai.” nga matut tsun dan ai re.
July 25 ya shani Myen hpyen dap ni n bungli hte wa gap ai ten, Nam Um Seng Hkawng mare na Slg Aik Law ngu ai Balawng mung shawa langai asak si sum wa ai re.
Ya sat hkrum ai mung shawa lahkawng gaw, Shd Ginraw Tu Ja asak 25 ning hte Shd Shanghting Brang Awng asak 27 ning yan rai nna, shan lahkawng a n ra hpe August praw 3 ya shani makoi mayang na re lam chye lu ai.
Nam Um mare makau grup yin hta Myen hpyen dap hte Balawng TNLA dap ni lai wa sai July 25 ya shani laja lana gap gasat hkat wa ai hte, Balawng mung shawa marai 2 si nna, langai hkala sawng wa ai re hpe chye lu ai.
