Shwegu, Palaung Taung Bum hpe Myen ni n lu gasat lai ai majaw, shani shagu Nbungli bawm wa jahkrat bun nga

Shwegu ginra de Myen hpyen dap lagaw lam hku htim gasat ai hta, masan nsa hkraw ai majaw, Shwegu Myen hpyen dap wang kaw n dai laman Y8 nbungli kaw na, nbung jawng hte hpyen n-gun wa jahkrat ai lam ni galaw taw ai nga ginra masha ni tsun ai re.

Shwegu myo shinggan deng lahkawng daram sha tsan ai Palaung Taung bum hta KIA PDF shara la da ai Post hpe Myen ni lagaw dap hte htim gasat ai kaw, sum machyi law ai majaw, lagaw dap hku htim gasat n gwi mat nna, nbungli hte hkrai gasat bun nga ai lam ginra mung shawa langai KNG shiga de n dai zawn tsun ai re.

“Shwegu hte Deng 2 daram pyi n tsan ai Palaung Taung Bum kaw gap hkat taw ai, dai kaw nga ai ni lang ai Drone ram ram madang tsaw ai nga tsun ma ai, Myen ni gade lung wa gade hkap shakre kau ai majaw, Myen ni lagaw lam hku pyi n-gwi hkawm mat masai da.” Nga tsun ai re.

Dai post shara kaw dung ai KIA PDF ni lang ai Drone madang tsaw ai majaw, Myen hpyen lung wa shagu hkap lu shingla gasat kau ai majaw, Ya ten Myen hpyen maga na Shwegu hpyendap wang de nbung jawng hku na hpyen n-gun sa ai lam ding yang galaw nga ai hpe chye lu ai.

Myen hpyen maga nbung jawng hte wa jahkrat da ai Myen hpyen manam ni Shwegu muklum kata hkan mung shawa hking hking na hkan kaichyan hkawm taw ai lam ginra masha wa n dai zawn matut tsun ai re.

“Lawu ga na lung wa ai Myen n sam hte n dai kaw nga ai Myen ni a n sam gaw anhte Nay Hkan ni gaw yu ai hte chye ai mi, n dai hpyen manam ni rai nga ai ngu,” nga tsun ai re.

Myen Hpyen maga na gaw, Manmaw hpe htim gasat na masing nga ai majaw, Shwegu hpe n lu n da htim gasat taw ai masa re lam ginra mung shawa ni tsun ai re.

Ndai laman hta gaw, Mandalay kaw na Mali hka lam hku Hpyen sanghpaw lung wa ai lam ai n nga shi ai rai tim, Mali hka lam mayan ni hta gaw, hpyen shamu shamawt ai lam ni galaw nga ai hpe chye lu ai.

Hpyen masa a majaw, Mya Lay, Sin Hkan, Kawng Tung mare hkran maga de Myen hpyen maga n sharap mat nna, jak li lam hpe pat tawn ai lam ginra mung shawa langai KNG shiga de n dai zawn matut tsun ai.

“Anhte Myar Lay, Sin Hkan, Kaung Tung, Bo Taung hkran ni de pat da ya ma ai, htaw ra hkran, n dai hkran nmai rap mat sai, Hpyen masa gaw gara hku kun? hpa nga gaw n na ai re mi, Hpa majaw pat ai ngu gaw anhte mung n chye ai lo,” nga tsun ai re.

Myen Hpyen dap ni gaw, Katha ginra yawng hpe zep zi gasat kau ngut ai hpang, Shwegu de bai htim gasat wa ai rai nga ai.

Shwegu hpe htim gasat taw ai ya n htoi shata 3 hkawt du wa tim, masan sa awng dang ai lam n lu majaw, Nbungli hte shani shagu wa gap gasat taw nga ai re.

Shwegu de htim gasat taw ai Myen hpyen la ni law malawng gaw, hpyen lahkawn la hkrum ai hpyen la ni hkrai re majaw, hpyen zai ladat mahkrun madup n nga na si hkala law ai masa re nga, ginra masha wa matut tsun maram tawn ai re.

Ndai laman Manmaw shawng lam hpyen man de gaw, laknak kaba loi li gap bun ai hta lai nna, kaga majan alak mi byin ai lam gaw n nga ai hpe chye lu ai.