Muse 105 Mile Myen hpyen byuha dap makau grup yin hta, November 26 ya shana kaw na, ya ten du hkra Myen hpyen dap hte dap hpawm hpung ni majan laja lana gap gasat hkat taw nga ai re.
November 27 ya shana maga hkying 5 daram hta, Myen hpyen dap jet nbungli hte wa gap bun ai majaw, mung shawa marai 2 si nna, marai 8 hkala sawng wa ai lam chye lu ai.
Dai gap gasat hkat ai hta, Kokang dap maga na Myen hpyen byuha kawng mayan hta Drone hte bawm sa jahkrat bun ai majaw, Myen hpyen dap maga sum machyi lam law w anna, Myen hpyen dap maga na mung nbungli, laknak kaba ni hte matut gap gasat hkat taw nga ai re lam Muse ginra masha langai KNG de tsun dan ai re.
“Ya mung gap gasat nga ai, mi hkying 5 daram hta nbungli hte wa gap ai majaw, mung shawa marai 2 si nna, marai 8 hkala sawng wa ai, dai kaw bungli galaw ai law malawng gaw Muse de hprawng yen ma sai” nga tsun dan ai re.
November 26 ya shana hta mung gunrai htaw ginlen shara ni hta laknak kaba wa hkrat bun ai majaw, mawdaw la Langai si nna, dai kaw tawn da ai Mawdaw ni hte gunrai jep n ta tsawm ra hten hkrum wa ai lam, ginra masha ni matut tsun dan ai re.
Dai hpawt manap hkying 9 daram aten kaw na, Namhpakka hte Maw Tawng lapran, Nam Hkai Hka, Mungbaw hka ni hta mung majan gap gasat hkat taw nga ai re.
Namhkai Hka makau grup yin hta nga ai mung mare masha ni yawng hpe jahkring gan htawt sit na lam, Kokang dap maga de na tsun sadi jaw da ai re.
Ya ten Mungmyit Sinli ginra hta, Myen hpyen dap shara law law hpe, dingdung daw dap hpawm hpung ni maga hkan htim gap gasat taw ding yang rai taw nga ai re.
