Shwegu de du wa ai Myen hpyenla nnan ni Mung shawa Sengke rim na lagu dut sha taw nga
Shwegu de du wa ai Myen Hpyenla Nnan ni Mung Shawa Sengke hte arung arai ni hpe lagu dut sha nga ai lam ginra mung shawa ni tsun dan ai re.
Ndai laman Shwegu de du wang ai Myen Hpyen hpung nnan ni Shwegu muklum kata kaw mung shawa sengke ni hpe hkrup mara rim lahkawn la nna, manu hkyam sa dik ai hku bai hkan dut taw ai lam, Shwegu mung shawa langai KNG shiga de n dai zawn tsun dan wa ai re.
“Shwegu kaw Myen hpyenla ni cycle ni kam ai hku lagu rimla nna, manu hkyam sa ai hte bai hkan lagyim dut hkawm nga ma ai, n dai hpyen hpung ni gaw n dai laman hta sha nbung jawng hku wa jahkrat da ai hpyenla nnan ni rai sam ai, nau n mu yu ga ai,” nga tsun ai re.
Shwegu muklum the deng lahkawng daram sha tsan ai Palaung Taung bum kaw majan byin taw nga ai n htoi bat mi daram du wa sai re.
Myen hpyen maga Shwegu de lagaw lam hku hpyen n gun n lu jat mat ai majaw Nbung jawng hte hpyendap wang kata de masha n gun jahkrat ai lam ni galaw lai wa ai hpe chye lu ai.
Myen hpyen ni gaw, Shwegu ginra kaw majan grai wa laja lana byin ai lam n nga tim, nbungli bawm shani shagu wa jahkrat bun nga ai lam chye lu ai.
July 31 ya shana maga hkying 4 aten daram hta mung, hkrunlam hkawm nbungli zawn re kaw na bawm jahkrat bun kau da ai lam nga ai hpe chye lu ai re.
“Hkrun lam hkawm nbungli lai wa ai she ngu mada yu nga yang mi Mare lai myo shinggan du ai hte mi rung! Nga jahkrat bun kau da ai hpe maram yu yang, hkrunlam hkawm nbungli kaw mung hpyenla ni jawn lawm nang nna bawm she hkan jahkrat taw sam ai ngu maram taw nga ai law,” nga matut tsun ai re.
Myen hpyen dap gaw, Manmaw de hpyen n gun sa na matu Shwegu ginra yawng hpe gasat zing lu hkra shakut taw ai rai nga ai.
Ya ten Myen hpyen dap ni gaw, Myo kata kaw rawng taw nga ai daram sha rai nna, Shwegu muklum grup grup yawng KIA PDF ni wang da ai masa re lam hpyen masa yu maram ai ni tsun da ai re.
