Tahkaw hka kaba ai majaw, Nmawk Ginra na Mung Shawa Hkauna Eka (1000) ram Hkalim hkrum
Manmaw nmawk ginra, Tahkaw hka kaw ladu lai Ja htu ai majaw, dai ning lanam ta ten Tahkaw hka kaba nna, hkauna pa mam lim ai mabyin hkrum sha taw ai lam ginra mung shawa ni tsun ai re.
Nmawk the Deng 14 daram tsan ai Tahkaw hka mazup, Shwe Myaung hte Myothit mare lapran kaw Miwa lauban langai jak kaba hte ladu lai ja htu ai majaw, ya na zawn mung shawa hkau na hka lim hkrum ai re lam, ginra mung shawa langai KNG shiga de n dai zawn tsun ai re.
“Ndai Asak prat du hkra n dai zawn hka hpyen tsin yam kalang mung n hkrum sha yu ai, ndai zawn byin ai gaw ja htu ai majaw re; Hka ka-ang kaw nan ja htu ai majaw Zaibru ga ni tsaw rawt wa nna, hka lam pat mat ai. hka gaw lai na lam n nga mat jang gaw kawng de du wa ai ga rai nga ai.ya nga yang hkauna ni hka lam tai ma nna, yawng lim mat sai Mam ni yawng mung lim yet mat sai majaw sum ma sai,” nga tsun ai.Dai ginra kaw, ya na zawn hka lim ai lam kalang mung nbyin yu ai re.
Tahkaw hka mazup kaw lai wa sai 2024 ning kaw na Ja htu hpang wa ai ya lahkawng ning jan du sai lam chye lu ai.
Hkauna lamu ga hka lim hkrum ai mare buga ni gaw, Sikaw, Mannawng, Hkung Sin, hte Hintar mare ni rai nna, hkauna lamu ga Eka (1000) mi daram hka lim hkrum mat ai rai nga ai.
Dai ning hkauna hka lim ai majaw, hkai da ai mam ni yawng lim yet ma ai sha n ga, n kau Ka dat da ai Da-ka sun ni hka lim na yawng yet mat nna, nnan kaw na bai galaw hpang la ra taw sai nga tsun ai re.
Hkauna shang ten lai wa ai tim, Hka kaba ai lam gaw n yawm hkraw ai majaw, dai ning na ladaw kaw mam n lu hkai la kau dat na mung shawa ni myit tsang taw nga ma ai re.
