Miwa Kokang ni uphkang taw nga ai Miwa Mung Jarit Pangsai muklum kaw nga ai nna, galaw lu galaw sha yak hkak taw ai mung shawa ni hpe Rahkaing AA Hpyendap kaw na n-gu buri 67 sa du garum jaw wa ai lam, ginra masha ni kaw na chye lu ai.Dai n-gu ni hpe, 1027 majan a hpang bungli n lu mat na yak hkak jam jau hkawm taw nga ai hpyen yen mung shawa ni hte htawt sit bungli galaw masha ni hpe garum jaw ai re lam, Pangsai na amyu shayi langai KNG shiga de n dai zawn tsun dan ai re.
“Rahkaing hpyen dap kaw na anhte Pang Sai Jinghpaw Wunpawng Htunghking hpung ni hpang de san wa ma ai, nan hte kaw grai yak hkak taw ai n inga ai i? nga san ai majaw, bungli n lu na n dai zawn yak taw ai ni grai nga ma ai ngu tsun dat yang, n-gu bye 10 lawm ai buri 67 sa sa ya ma ai,” nga tsun ai.
Ya sa du garum jaw ai n-gu buri gaw, bye 10 lawm ai buri rai nna, buri 67 sa du garum jaw na lam tsun da ai rai tim, kaja du wa ai gaw, buri 62 sha naw re lam chye lu ai.
Dai buri 62 hpe June 19 ya jahpawt Jinghpaw Htunghking hpung ni hpang de sa du shalai ap ya wa ai lam chye lu ai.
Dai N-gu hpe mani kaw na garan jaw hpang ya taw sai rai nna, kaning zawn re ai ni hpe gade daram lu garum ai ngu lam the seng nna, ginra amyu shayi wa n dai zawn matut tsun da ai re.
“Yihku de na hpyen yen ni, lawu ga de na Myen, Rahkaing, ni n dai kaw gawk shap na bungli wa tam galaw sha na nga ai ni, 1027 majan hpang kaw na bungli n lu na yak hkak taw ai ni hpe garan jaw ai re. Marai langai kaw bye 2,3 dang sha she ang na re, anhte ginra masha ni na matu chyawm n lawm ai,” nga tsun ai.
Pangsai Muklum hpe Miwa Kokang kaw na 1027 majan masing kaw gasat zing madu la kau nna, ya ten, dai ginra hpe Kokang Miwa ni uphkang taw nga ai ginra mung rai nga ai.
1027 majan ten laman Rahkaing AA ni mung dai ginra majan hta shang gasat lawm wa ai rai nna, hpaga sutrai ginlen dabang kaba deng 105 hpe MNDAA hte AA ni pawng na gasat zing madu kau lu wa ai rai nga ai.
Mung Yu Deng 105 ginra hpe gasat zing madu ngut ai hpang, dai shara kaw AA hte rau MNDAA, TNLA ni pawng hpawm nna dap jung wa ai rai nga ai.
Lai wa sai March shata kaw Kokang ni Kutkai na TNLA ni hpe gasat shagrawt wa ai ten, Deng (105) kaw dung ai Balawng TNLA hpung ni hpe Kokang ni dawm kau shangun sai re.
Mungmyit Sinli kaw dung ai Rahkaing AA dap ni hpe (မီးနဂါးစစ်ဒေသ) ngu shamying da nna, Jinghku rawt malan ni the pawng hpawm nna, Sut Hpaga lam, Hpyen masa lam ni hpe rau jawm shakut galaw taw ai lam chye lu ai re.
