Hpakant, Namhpyit mare Myanmar Thura Company wang hta but rawng nga ai Myen hpyen dap hpe KIA hte PDF dap kaw na sa htim gap gasat wa ai lam chye lu ai.
October 25 ya shana hkying 10 daram hta Myanmar Aung Tura Company wang hpe, KIA Dung (6) hte PDF ni pawng hpawm nna sa shang htim gasat ai hta, dai kaw rawng nga ai Myen hpyen hpung ni yawng hpe sa htim gap gasat kau nna, sinat laknak machyu pala ni mung padang dip zing la lu ai hte, Myen hpyen ginsum dap n kau hpe mung wan nat jahten kau da ya ai lam chye lu ai.
Dai ten makau grup yin hta nga ai Myen hpyen hpung ni kaw nna, dai shara de laknak kaba ni hte gap shadam bun wa ai lam ni mung nga ai re hpe chye lu ai.
Company wang kaw nga ai, Myen hpyen hpung hpe sa htim gap gasat shachyut kau ai hpang, dai Company wang hta tawn da ai lung seng buri ni hpe, Yemase la ni sa htaw hta la jawng taw ai lam, Hpakant ginra masha langai KNG shiga dap de tsun dan ai re.
“Daihpawt hkying 10 daram kaw na sa shaw la jawng taw nga mai ai, sa shaw la ai nlung gaw အောက်ကျောက် nlung ni rai nga ai, kaja ai nkau mung gaw she n lawm na i.” nga tsun dan wa ai re.
Myanmar Tura Company wang hta jahpawt kaw na shana maga hkying 2 daram aten du hkra mung shawa hkying lam lungseng sa shaw la mat ai hpang, shana maga de hkying 2 chyen daram hta mung shawa jawn mawdaw 3 hte Myen hpyen dap ni sa wa nna, bai sa pat kau ai lam chye lu ai.
Myen hpyen dap ni bai sa wa ai majaw, dai kaw lungseng sa shaw la taw nga ai Yemase la marai 30 daram rim hkrum wa ai lam nga ai hpe chye lu ai.
Myanmar Tura company lauban U Kyaw Thu hpe Myen hpyen dap kaw na, 2022 ning hta, PDF ni hpe madi shadaw garum jaw taw ai ngu kabaw hte shi lu ai sutgan yawng hpe zing madu la kau ya ai rai nga ai.
