Nawnglut ginwang, Sezin ninghtawn Nanpuk mare gat maga de, Sam Hkyeng SNA dap ni gap dat ai laknak kaba si a majaw, mungmasha marai 7 hkala hkrum wa ai lam chye lu ai.
Gap dat ai laknak kaba si lahkawng hta, langai gaw, gat kaw wa hkrat nna, langai gaw n ta kaw wa hkrat hkra ai re lam dai ginra na mung shawa langai KNG de ya na zawn tsun ai re.
“Sam Hkyeng SNA ni gap dat ai laknak kaba si lahkawng mare kata, gat hte nta langai kaw wa hkrat ai, mung shawa marai 7 hkala ai ga rai nga ai. ya dai hkala hkrum ai ni hpe PDF ni kaw na tsi tsi ya taw nga ai” nga tsun dan ai re.
Hkala hkrum ai mung shawa marai 7 hpe ya ten PDF dap ni tsi tsi ya taw nga ai lam chye lu ai.
Sam Hkyeng dap ni laknak kaba gap bun ai Nanpuk mare gaw, PDF hte KIA ni jahkring hkring gat sa mari ai lam ni nga ai majaw, gap bun rai na re nga, ginra masha ni tsun maram da ai re.
Sam Hkyeng SNA dap ni gaw PDF dap ni hpe dai mare de gat n sa mari na matu tsun jahkrit da ai lam ni nga ai rai nna, lama dai mare kaw PDF dap ni matut nna, gat sa mari taw yang laknak kaba gap bun na ngu tsun jahkrit wa yu ai lam ni mung nga ai re hpe chye lu ai.
Ya laknak kaba si gap hkrum ai mare gaw, Sezin hte deng 5 ram sha tsan ai shara rai nna, dai ginra hta, KIA PDF, SNA, Pyi Thu Tsit, Myen hpyen dap ni shamu shamawt ai mare kahtawng re lam chye lu ai.
Sezin mare makau grup yin hta, SNA Myen hpyendap ni hte Wunpawng Mungdan Shanglawt Hpyendap KIA Dung 26 ni hte jahkring hkring gap gasat hkat taw nga ai rai nna, ya ten hpyen masa lam ding yang matut shaja hkat taw nga ai re lam chye lu ai.
