ShigaSimsa lam

Kokang Dap ni Lashio mare kaba na kaja nan yen ya sana kun?

Kokang MNDAA hte Myen Hpyen dap gap hkat jahkring da ai the rau, Kokang dap ni Lashio kaw na gau ngwi ngwi hting nut mat wa ya ra na re lam, Miwa Asuya maga Gaw Nyein shani hta, Lashio Gaw Nyein poi hta sa tsun mat ai re.

Lashio mare kaba hpe Kokang MNDAA dap maga na 2025 ning June shata hpang jahtum tawn na yen ya na matu Miwa maga na dip n gun jaw tsun shadut nga ai re.

Lashio mare kaba hpe Kokang dap maga na bai yen ya ra na lam, Miwa asuya na dip n gun jaw tsun taw ai rai tim, Lashio mare kaba hta gaw dai ni du hkra lak lai ai lam n nga ai nga, Lashio ginra masha ni tsun ai re.

“Kaga hpa lak lai ai lam rai n nga shi ai, shawoi hkan na zawn sha mare lawk shagu de mare shim lam a matu nga na zuphpawng ni shawoi hkan na zawn sha woi galaw taw nga ai, Gadai hpa htingnut ai hpyen shamu ai mung n mu ai, poi galaw na she pyaw taw ma ai,” nga tsun ai re.

Kokang MNDAA dap hte Balawng TNLA dap maga 2023 ning October 27 ya shani kaw na htim gasat hpang wa ai, 1027 majan masing hta, lahta sammung ginra yawng ngu na ram hpe htim gasat padang dip zing la lu wa ai re.

Lashio mare kaba hpe Kokang MNDAA hte Dap Hpawm ni 2024 August shata praw 3 ya shani htim gasat zing madu wa lu ai rai nga ai.

Amyu Sha rawt malan dap hte Myen mung ting na PDF dap ni Myen hpyen dap hpe htim shagrawt taw nga ai ten, Miwa Asuya a dip n gun jaw ai lam hte Kokang dap maga na Myen hpyen dap hte ndai shata laman hta gap jahkring myit hkrum lam la wa ai rai nga ai.

Kokang Dap Zuhpawng

Ya na zawn gap hkat jahkring da ai hte rau Kokang MNDAA dap maga Lashio mare hpe bai yen ya ra na lam tsun shadut hkrum  taw nga ai rai nga ai.

Miwa maga na dip n gun jaw tsun taw nga ai Lashio mare kaba kaw na bai yen ya ra na ngu ai masa lam hte seng na mung masa yu maram ai salang langai gaw ndai zawn tsun maram tawn ai re.

“Kokang dap ni Lashio mare hpe lama yen ya ra na ngai tim, Myen hpyen dap a lata de kalang ta ap ya kau na gaw n rai nga ai, Dap hpawm rai nga ai UWSA Wa shing n rai BPLA dap zawn re ni hpe ap da na she hting nut na re” nga tsun  ai re.

Related Articles

Back to top button