Majan ShigaShiga

Tanghpre lam de Myen hpyen dap ni hpyen n-gun jat nga

Tang Hpre maga de Myen hpyen dap hpyen shamu shamawt wa ai majaw, majan byin wa na myit tsang nga ma ai re.

Mani January 29 ya jahpawt hta Myitkyina Myen hpyen dap daju na Hpyen n’gun 100 ram Tang Hpre maga de man yawng lung wa ai hta, Lamung Zup mare du hkra Mawdaw the wa htaw sa da na, Lamung Zup kaw na Tanghpre maga de lagaw lam the matut lai lung wa sai nga ginra masha ni KNG shiga dap de tsun dan ai re.

“Mani Hpawt M.P.Hk kaw na Myen hpyen n’gun 100 ram ning lamung Zup du hkra wa htaw sa da ai nga, dai kaw na lagaw lam bai matut hkawm lung wa sai, Tang Hpre maga de majan byin wa kun,” nga tsun ai re.

Myen hpyen dap maga na, ya na zawn hpyen shamu shamawt wa ai majaw, Tanghpre ginra de majan byin wa na masa nga wa ai majaw ginra masha ni myit tsang nga ma ai re.

“Ndai de hpa majan mung n byin ai gaw na sai, ya Myen ni lung wa ai nga yang gaw, Nam na ni mung she n hkap na i? lama Myen ni lung wa na Nam na ni hkap gap rai yang gaw majan byin wa na rai nga ai,” nga dai ginra na amyu shayi langai tsun ai re.

Dai ginra maga de lai wa sai Shata masum ram hta, Tang Hpre hte Tiyang Zup lapran na Myen hpyen dap shara ni hpe htim shagrawt ngut ai hpang majan byin ai lam n nga mat sai rai tim, ndai laman Myen hpyen dap ni hpyen shamu shamawt ai lam ni bai galaw wa ai mung rai nga ai.

Related Articles

Back to top button