Waimaw Hpyen yen mung shawa ni tawn kau da ai dum nta kata na arung arai ni yawng hpe, Myen hpyen dap hte Pyithutsit dap ni langam n ngam hkra lagu la taw nga ai nga, dai ginra na mung shawa ni tsun ai re.
Lai wa sai 2024 ning May shata kaw na Waimaw ginwang de KIA hte pawng hpawm dap ni htim shagrawt majan shang wa ai majaw, Waimaw Washawng lam mayan de na mung shawa yawng tinang man ang ai shara ni de hprawng yen hkawm mat ra ai re.
Majan a majaw mung shawa ni yawng hprawng yen tau kau da ai, dum nta na arung arai ni hpe Myen hpyen dap hte Pyithutsit ni shan hte ra ai rai ni yawng shaw la kau ya ai nga ginra masha wa ndai zawn tsun dan wa ai re.
“Pyithutsit hpyen la ni nga ai de chyawm gaw ya hte na yawng kaja ai ahkyak ai rai ni yawng lagu la kau ya ma masai, ahkyak ai Bau ni, rai chywi jak ni, hpai la mai ai gaw yawng hpai la ai ga rai nga ma ai, hpun du hkra yawng htaw la kau ya sai gaw, hpun htaw la kau ya ai gaw, Tangbau mare hkan na du hkra lagu htaw la kau ya masai,” nga tsun ai re.
Waimaw ginra de KIA dap maga May shata kaw na htim gasat shang wa ai gaw, September October shata lahkawng laman hta Chihpwi, Saw Law, Pang Wa, Phimaw ginra ni yawng hpe htim gasat zing madu kau nna November 20 ya shani hta mung Kanpaiti mare kaba hpe htim gasat zing madu wa ai re.
Majan byin wa ai ten, dai ginra na mung shawa ni hkum kaman lawt daw sha hprawng yen pru wa ai kaw na, ya dum nta hta tawn kau da ai arung arai ni yawng hpe lagu mya la kau ma ya sai majaw, ginra masha ni myitru tsinyam hkrum nga ai re.
Waimaw Myo kata na mung shawa nkau hprawng yen ai ni nga ai zawn nkau mung n yen ai sha tinang nta sin na nga taw ai lam chye lu ai.
Waimaw ginwang kata na Zahkung Ting Ying woi awn up hkang ai ginra yawng hpe htim gasat zing madu la ngut ai hpang, Ya matut na tim Waimaw makau grup yin hta hpyen masa ding yang matut shaja hkat taw nga ai re.
Ya na zawn hpyen masa shaja hkat nga ai majaw, mung shawa ni hpe lam kaba hku na lai shangun taw ai rai tim, mare kata de tsep kawp n shang shangun ai lam ginra masha wa n dai zawn matut tsun dan wa ai re.
“Mare de gaw lahkawng maga na n shang shangun ai lam dingyang gaw mai lai ai, mare de nta de n shang shangun ai, Lamyang mare lawu daw the wuyan mare ding yang n shang shangun ai, lahkawng maga dai hku yu hkat taw sam ma ai, n shang shangun ai ngu gaw shan hte shim lam na matu she n rai i? dai hku nshang shangun na gaw, mung shawa arung arai ni hpe kam mara htaw la taw,” nga tsun dan ai re.
Myen hpyen dap hte Pyithutsit dap ni shim lam a matu mung shawa ni hpe n shang shangun na shan the ra ai arung arai yawng hpe lagu shaw la taw ai lam mung rai nga ai.
Dai ginra na hpyen yen mung shawa ni gaw, Lasang Awng wa uphkang Gaiwang rai nga ai, Nawng Hkying, Gwihtu ginra ni de hprawng yen taw nga nna, ya majan kalang bai byin wa na masa nga ai majaw, hpyen yen dabang kalang bai htawt sit na hkyen taw ai hpe chye lu ai.
Hpyen yen mung shawa yawng mung hpyen yen aten ladaw na wa ai the rau lam shagu hta yak hkak wa nna, garum ningtum lam ni ra gadawn taw nga ai re.