Miwa jan shatai na matu dut sha hkrum ai amyu shayi ni mungdan ting madang grau grau law jat wa.

Miwa jan hku na dut sha hkrum ai amyu shayi ni Myen mung ting madang chyam bra wa taw ai nga Jinghpaw amyu shayi hpung – Thailand (KWAT) a sumtang laika hta tsun da ai re.
Miwa mung hta bungli kaja tam ya na ngu masu hkalem nna dut sha hkrum nga ai lam hta, Yangon, Mandalay, the Sagaing ginra hkan na ni mung lawm ai rai nna, law malawng gaw, Jinghpaw mung the Sammung ginra na re nga December 19 ya shani shapraw ai KWAT a sumtang laika hta tsun da ai re.
Miwa mung de masha dut sha hkrum ai lam gaw, 2005 ning kaw na 2009 ning du hkra shaning shagu law jat taw nga ai kaw na Covid ten ladaw 2020 kaw na 2023 ning laman tsep kawp n nga ai daram yawm mat ai rai tim, 2024 ning kaw na grai bai law jat wa ai lam matut tsun da ai re.
Covid tara hpe shayawm kau ya ai hte rau Miwa mung pru shang lam bai hpaw wa ai the masha dut sha hpaga galaw ai lam ni mi na zawn sha bai law wa ai lam tsun tawn ai re.
Myen mung kata na amyu shayi ni Miwa mung de dut sha hkrum nga ai lam hte seng nna, Jinghpaw Wunpawng amyu shayi hpung – Thailand (KWAT) a tsun shaga ahkang lu Saranum maran San Htoi gaw shi a ningmu hpe ndai zawn tsun ai re.
“Anhte mungdan kaw gaw majan ni byin ai majaw mungdan a sut masa lam ni hkrat sum wa ai zawn, bungli taw ai lam ni mung masa npyaw ai lam ni a majaw tinang a dum nta masha ni hpe bau ra ai nga nna ni htep ai mungdan ni de pru mat ai ramma ni hta grau byin ai hpe mu lu ai” nga ai re.
Miwa mungdan kaw 1980 ning kaw na 2015 ning du hkra nta langai hta ma langai sha mai shangai ai one child policy tara Upade a majaw dinghku a amyu nli nmat na matu la kasha ni hpe sha shangai ai majaw, 2024 ning hta gaw miwa mung na la jahpan gaw num jahpan hta wan 30 jan grai law jat mat ai nga ka da ai re.
Dai zawn re lam yan ni a majaw hkauna galaw ai yu maya masha ni a matu miwa num ni hpe hpyi hkungran la na matu grai yak wa ai majaw mungdan htingbu rai nga ai myen mungdan zawn re kaw na numsha ni hpe masu mari la nna hkrungran ai du hkra byin wa ai mung rai nga ai.
Nkau mabyin ni hta gaw myen mung kaw na amyu shayi ni hpe ma langai shangai jaw yang Myen Kyat sen 100 jaw na nga na masu hkalem ai lam ni mung nga ai hpe chye lu ai.
Ya na zawn amyu shayi ni masu dut sha hkrum nga ai lam hte seng na Myen Miwa jarit Muse muklum hta nga ai amyu shayi langai mung shi a ningmu hpe ya na zawn tsun ai re.
“asak 16, 17, 18 re ni miwa de sumtsaw wa tsaw ra na shata mi mun lahkawng lu na nga nna ganhkau hku na matut mahkai rai na du wa na gaw, nang kaw du wa ai hpang gaw mi gan hkau kaw masu jahta hkat ai hku bai n rai mat, Miwa jan tai ra na nga kaw na gaw, shawng mawng shawng hkang rai ba galaw bra ayai na, lam amyu myu hku bai lagu pru wa ra ai ni grai law ai.”nga ai re.
Miwa jan hku na masha hpaga ga hkrum ai hta jarit mayan hpyen yen dabang hkan na amyu shayi ni, mung masa a majaw jawng jahkring da ai ramma ni the dum nta kata manghkang amyu myu a majaw yak hkak nna du wa ai ni mung lawm ai hpe mu lu ai re.
Masha hpaga ga hkrum ai a, tsalam shadang 85 daram gaw masha hkum hkrum hkat na byin ai mabyin ni rai na ngam ai tsa lam shadang 15 gaw online ntsa na masu katut ai lam re hpe chye lu ai .
Dai sha n ga masu ai masha law malawng gaw jinghku jingyu manawng manang ni rai nna masu ai masha malawng gaw amyu shayi ni re ai lam sumtang laika hta mu lu ai re.
Ya na zawn dut sha hkrum ai amyu shayi ni law malawng gaw kamhpa mai ai jinghku jingyu manaw manang ni kaw na jak rung the hkaisun sha n ga, dum nta kaw garum masha hku na bunli ni kaw na ja gumhpraw law law shang na ngu ai zawn re ga ni hte masu hkalem la hkrum ai re ai lam Sara num san htoi gaw ya na zawn matut tsun dan wa ai re.
“Manang ni kaw na kam ram ai masha re, jak rung hte shat seng zawn re ni kaw bungli lu na re, nkau hpe gaw nta garum bungli jaw na nga na masu woi mat ai ni mung nga ai, rai tim mung kaja Miwa mung du ai shaloi gaw Hotel kaw shaga da nna, lauban ni sa shaga na ra ai nga tsun nna, kaja nan Miwa la ni bai sa shaga ai shaloi gaw, shan hte a madu jan shatai na matu sa shaga woi ai zawn re mabyin lam ni law law re.” KWAT amyu shayi hpung na lit nga ai Saranum matut tsun salang da ai re.
Hkrungran la ai miwa la ni gaw asak 20 ningkaw na 40 grup yin ni rai nna, nkau gaw myit hte hkum hkrang nau ngring sai ni mung lawm ai lam chye lu ai.
Dai sha n ga miwa jan hku na dut sha hkrum ai law malawng gaw gawk kata kaw zaw hkat sharawng hkrum ai lam ni, hkum shan roi rip ai lam ni the makau grup yin ni the matut mahkai n galaw shagun ai zawn re lam ni hte shinggyin ahkaw ahkang tawt lai hkrum ai nga KWAT a sumtang laika hta tsun da ai re.
Dai majaw nkau amyu shayi ni gaw ahkaw ahkang lu ai aten dut sha hkrum ai la wa a lata kaw na miwa hpyen la ni hpang de hprawng yen sa mat ai kaw na bai lawt wa ai ni mung nga ai rai tim, nkau miwa hpyen la ni gaw mi hprawng wa ai la a nta kaw bai sa ap ya ai lam ni mung nga ai hpe chye lu ai.
Bai 2019 ning hpang daw de Miwa jan hku na dut sha hkrum ai lam ni yawm mat ai rai tim Sammung Lauk Gai hte Wa mung hkan gaw Chyahpyen ngu ai online ntsa kaw gumhpraw masu sha ai bungli, hpaida wang ni hta bungli galaw ai lam ni the num sha ni hpe sex service jaw shangun ai lam ni grau grau law wa ai hpe mu mada lu ai lam matut tsun da ai re.
Jinghpaw Wunpawng amyu shayi hpung -Thailand KWAT kaw na hta gahkin da ai jahpan hta 2019 ning hta marai 109, 2020 hta marai 34, 2021 ning hta marai 34, 2022 ning hta mrai 12, 2023 ning hta marai 13 gaw miwa jan tai na matu dut sha hkrum wa ai rai nna asak kaji htum 13 ning kaw nna asak kaba dik 55 ning du hkra lawm ai lam chye lu ai.
Dai hta law malawng gaw 18 ning hte 25 ning lapran na ramma ni re lam sumtang laika hta tsun da ai hpe mu lu ai re.
Ya na zawn miwa jan galaw na matu dut sha hkrum ai lam ni nbyin na matu gaw miwa asuya hte laknak lang rawt malan hpung ni yawng kaw mung lit nga ai lam, KWAT tsun madi madun da ai re.