Nawnglut Ginwang, Namawn, Nammawkgam mare masha ni hprawng yen taw nga ai, Nyaung Pin Hpyen yen dabang de April 15 ya shana Nbung laru kaba wa ai majaw, Hpyen yen dum n ta htenza mat nna, Hpyen yen mung shawa ni yak hkak hkrum taw nga ai lam, Hpyen yen lit nga ai ni kaw na chye lu ai re.
April 15 ya shana hkying 8 chyen aten, Indaw Nawng a sinna maga de Nbung laru kaba bung ahpawt wa ai majaw, Hpyen yen dum n ta 10 jan hten run mat ai lam hte seng na dai ginra na Hpyen yen lit nga ai Salang langai KNG de ndai zawn tsun dan wa ai re.
“April 15 ya shana hkying 8 chyen hte hkying 9 aten lapran hkying hkum chyen mi ram kaw laru kaba wa, mu hte Myihprap la rai laru kaba ru wa nna, hpyen yen dum n ta yan 2 gaw agrawp mat ai, ngam ai ni mung rawng n mai mat sai, nga mat sai” nga tsun dan ai re.
Dai Nbung laru a majaw, Masha Si hkala ai lam gaw hpa n nga ai rai tim, lagaw n kung mat ai Salang langai gaw, n ta kata na n lu hprawng yen na n ta gamyet hkrum ai majaw, loi li machyi hkrum ai hta lai nna, laga masha ni gaw hpa n ra ai lam chye lu ai.
Dai hpyen yen mung shawa ni gaw, ya ten tinang lu lawm ai n-gun atsam hte dum n ta bai gawgap taw sai rai tim, maga mi de garum ningtum lam ni mung naw ra taw ai lam tsun ai re.
Nyaung Pin hpyen yen mung shawa ni gaw lai wa sai 2024 ning June shata kaw na hprawng yen ai Hpyen yen mung shawa ni rai nna, Nam kata mai byin ai hku na lahkawng ning hkawt hprawng yen taw sai hpyen yen mung shawa ni re majaw, garum ningtum law law ra ahkyak taw ai lam n dai zawn matut tsun dan da ai re.
“Ya anhte rawng nga ai sum ni gaw, laning mi jan lahkawng ning du wa sai majaw, Sumbwi Muga ni gaw tsam je ma wa sai majaw, shim lam hpa n nga mat sai, mana na zawn, nbung laru kaba hkrum rai yang gaw, yup shara n nga ma, hpun n ba yawng madi ma rai shana tup n htoi hkren dai hku shalai kau ra ai. Ya hkyak hkyak ra taw ai gaw, gawgap lam kaw ra ai Hpun kawa ngau the malu masha Ja gumhpraw ni re ga rai nga ai. Anhte ndai hpyen yen dabang ni hpe gaw hkawm sa hkawm wa yak ai shara re majaw gaw gadai mung nau n lu du ma ai, yak yak hkak hkak rai na tawt lai nga ga ai,” nga matut tsun dan ai re.
Nyaung Pin Hpyen yen dabang hta gaw, Hpyen yen mung shawa marai 300 ram nga ai hpyen yen dabang langai re lam chye lu ai.
Dai ginra de Wunpawng Mungdan Shanglawt Hpyendap KIA hte PDF dap ni Nyaung Pin, Chaung Wa, Way Lung Mare ni hpe htim gasat zing kau ai hpang, Sam Hkyeng SNA ni Jinghpaw re ai ni hpe rim zingri wa ai majaw, Na mawn hte Nammawkgam mare hkan na mung shawa ni June shata kaw na hprawng yen mat ai Hpyen yen mung shawa ni rai nga ai re.
Ya ten Nawnglut Ginwang Namawn, Mai Nawng Mare ni hkan Myen Sam ni mai nga ai rai tim, Jinghpaw amyu sha ni gaw tsep kawp n mai nga ai sha n ga, Jinghpaw n ta re ni yawng hpe tsi hkyeng chya nna pat da ya ai lam matut chye lu ai.
