Manmaw majan matut gap gasat nga

Manmaw mare kaba hpe KIA htim shagrawt nga ai n htoi 45 ya hkawt na wa ai ten, Manmaw mare kaba a tsa htam shadang 80 daram hpe KIA up madu da lu sai rai tim, shani shagu laknak kaba ni hte gap gasat hkat taw nga ai re.
Manmaw majan hta lai wa sai laban ya shani kaw na, KIA the pawng hpawm dap maga Myen hpyen dap shara hpe htu shadut htim gasat ai lam gan gan jahkring da ai ten, Myen hpyen dap maga na htu shadut sa wa ai majaw January 15 ya shani gasat gala lam ni nga wa ai re.
“Myo kata kaw gaw Myen hpyen dap da anhte da gayau gaya nga ai, daw the daw nga taw nga ai rai nga ai, Myen ni anhte nga ai daw maga de lung wa ai majaw gap hkat ai, January 15 ya shani nga yang anhte nga ai Tsi Rung hte စုပေါင်း rung maga Myen ni lung wa ai majaw, gap hkat ai, anhte maga na htim gasat ai lam gan jahkring da ai majaw Myen ni mung shawa dum nta hkan nat ai lam ni galaw nga ai ga rai nga ai,” shawng lam magam gun langai tsun dan wa ai re.
Ya ten Manmaw myo kata hta Myen hpyen dap hte KIA dap ni daw hte daw nga taw let, shada sin yu hkat taw nga ai masa rai nna, Myen hpyen dap maga Drone ni hte shani shana kai chyan nna, nbungli drone hte gap bun ai lam ni ding yang byin nga ai re.
Manmaw ginra hpe Myen hpyen dap ni n tat sum kau hkra ladat amyu myu hte ning hkap shingla gasat taw nga ai rai nna, Hpyen dap shawng hkan na mung shawa dum nta ni hpe nat jahten kanaw jahten ai lam ni galaw nga ai re.
Ndai shaning ning nan hpang kaw na Manmaw majan hta KIA dap maga na n’gun grau shadat wa ai zawn Myen hpyen dap maga na mung shawoi na hta grau kaba ai n bungli bawm ni hpe lang wa ai nga, shawng lam hpyen magam gun hte ni nawn ai ni tsun ai re.