Jinghpaw mung kata na Miwa jarit mayan hta majan n shabyin na matu Miwa Asuya maga na KIA dap hpe hpyi shawn da ai lam chye lu ai.
Ndai shata praw hta Miwa Dakasa wa hte KIO Tingnyang Up malai Dukaba Gunhtang Gam Shawng hte Miwa mung Yin Jang mare kaba hta hkrum jahta ai hta hpyi shawn wa ai rai nga ai.
Miwa maga ra sharawng taw ai gaw, jarit mayan hta majan n shabyin na matu hte Myen hpyen dap galaw na ra lata poi hpe madi shadaw shang lawm ya na matu re nga Dukaba Gun Maw BBC shiga hta tsun da ai re.
“Miwa maga de na hpyi shawn ai, jarit mayan hta majan n shabyin na ngu ai lam hpe hkap la lu ai rai tim, KIA maga na gaw Myen hpyen gumshem lai ladat hkrat sum mat hkra gaw, lai di n lu majan gasat sa wa ra na re lam, KIO maga na Miwa dat kasa hpe bai n htang tsun kau da ai,” lam BBC Shiga hta tsun da ai re.
Miwa maga de na mung, Myen hpyen dap a ra lata poi galaw na matu hkyen nga ai lam hte seng nna, KIO a ningmu hte shang lawm lu na masa lam hte seng nna san shaga wa ai hpe KIO maga na gaw, KIO a uphkang gai wang kata hta gaw, ra lata poi galaw lu na lam n nga ai,nga bai tsun ai lam chye lu ai.
Jarit mayan hta Majan n shabyin na matu miwa maga de na tsun hpyi shawn nga ai ten, KIA maga na Pang Wa mare kaba hpe htim gasat zing madu kau ai majaw, Jarit Chyinghka lam yawng hpe Miwa maga pat kau ai re.