Nmawk de Myen hpyen n’gun kaba hte htu shadut taw ai majaw Majan matut laja nga

Manmaw kaw na, Nmawk de Myen hpyen dap hpyen n’gun 400 ram hte htu shadut htim gasat taw nga ai majaw, Nmawk makau Deng 6, 7 Awng Mye makau grup yin hta shani shagu laja lana gap gasat hkat taw nga ai re.
Myen hpyen dap maga na, majan byin ai shara de nbungli hte gap gasat ai sha n-ga, Manmaw Ts.K.Hk (21) kaw nna laknak kaba hpan hkum hte gap garum ya taw ai zawn, madang tsaw ai Drone ni the mung ding yang wa gap bun taw nga nna, hpyen n-gun jat ai lam ni hpe matut galaw nga ai re.
“Nmawk deng 7, 8 grup yin de gaw ndai October 20 ya shani kaw na shani shagu gap ma ai,(437) de gaw grai n du shi ai, anhte maga na ni mung shani shagu ning hkap tik tik rai taw nga ai, hpyen masa gaw laja ai ga rai nga ai,” nga Dukaba Naw Bu tsun ai re
Myen hpyen dap maga na, n dai shata 20 ya shani kaw na hpri gang modo mali lawm rai, hpyen n’gun kaba the numdaw kalang bai htu shadut lung wa ai majaw, shani shagu majan byin taw nga ai lam rai nga ai.
Ya ndai lahkawng masum ya gaw majan gap gasat ai lam ni nga taw tim, majan byin ai lam loi yawm taw nga nna, hpyen masa matut shaja hkat taw nga ding yang re, nga Dukaba Naw Bu matut tsun ai re.
“ya ndai lahkawng masum ya gaw loi bai zim ai masa re ga raii nga ai, Zim ai ngu tim Myen hpyen maga na hting nut mat ai n re, dai kaw naw nga taw ai majaw gaw, majan gaw laja ding yang rai na re,” nga tsun ai.
Nmawk mare kaba hpe KIA dap maga lai wa sai August 29 ya shani htim gasat zing madu kau lu ai hpang, Myen hpyen dap maga na hpyen n’gun 400 ram the bai htu shadut taw nga ai gaw shata lahkawng du sai re.