Chihpwi mare Myen hpyen byuha dap hpe KIA dap maga dai na de tsep kawp htim gasat zing kau sai lam Shawng lam hpyen shi sawk ni tsun ai re.
Chihpwi Ginwang kata na Myen hpyen dap shara 5 hpe Wunpawng Mungdan Shanglawt Hpyendap KIA kaw nna September 29 ya jahpawt kalang dat htim gasat wa ai hta Chihpwi Myen hpyen Byuha dap kaba hpe gaw dai na maga September 30 ya shana maga hkying 2:30 hta tsep kawp htim gasat zing madu la lu sai re lam, Chihpwi ginra masha langai KNG shiga dap de tsun dan ai re.
Chihpwi Ginwang kata na Chihpwi muklum balik dap, Chihpwi mare kaw na Pang Wa sa lam ntsa na Deng 4 Shagyit, Chihpwi mare numshang na Pyithutsit shagyit, Kanpaiyang sa lam na, Asia World gawdin pa makau na Myen hpyen dap hte Sha-ngaw Pyithutsit shagyit ni hpe mani gap gasat zing la lu wa nna, Chihpwi Byuha dap kaba hpe gaw dai na maga de hkying 3 daram hta gasat zing kau lu ai rai nga ai.
“Mani hpawt hkying 5 daram kaw na , Asia World gawdin pa maga de na gap gasat hkat hpang wa ai, Chihpwi mare kaw mung shani ting gap gasat hkat wa ai, dai gap hkat wa ai kaw na gaw mana shana yup tung hkying 12 chyen jan ten nbungli hte bawm sa sharu bun wa ai, bawm 40 ram sa jahkrat bun kau d ai, yup tung ten re nga yang gaw gade ram hkra hten ai ngu hpe a tsawm tup hkrak n chye shi ai, Ya Chihpwi byuha dap kaba hpe lu gasat zing kau jang gaw, Chihpwi mare yawng hpe lu gasat zing kau sai ga rai nga ai,” nga Chihpwi ginra masha langai KNG de tsun dan wa ai re.
Myen balik 30 daram dung ai Chihpwi balik dap hpe September 29 ya shana maga hkying 2 hta gasat zing kau nna, Chihpwi byuha dap kaba hpe matut htim gasat ai hta dai ni September 30 ya shana maga hkying 3 daram hta zep zi zing madu kau lu sai nga tsun wa ai re.
Chihpwi byuha dap hta Myen hpyen n’gun 50 daram nga ai shara hpe mani hpawt kaw na htim gasat wa ai hta Myen hpyen dap maga si hkala lam ni law wa nna, n kau hpyen la ni mung shawa hking hte hprawng pru mat ai ni mung nga ai lam chye lu ai
Ya ten Chihpwi muklum yawng hpe KIA zing madu da lu sai rai nna, KIO a uphkang sairu jahkrat sa mat wa lu hkra matut galaw sa mat wa na re lam KIA hte ni nawn ai ni tsun ai re.
Chihpwi muklum hpe htim gasat zing madu kau ai hpang, Pang Wa maga de matut htim gasat mat wa na masa nga ai lam ginra masha ni tsun maram nga ma ai re.
