Namawn Mare Nawku Jawng Hta Myen Hpyen Dap Hte Pyithutsit Ni Dap Jung Shara La Nga
Nawnglut Ginwang, Na Mawn Mare, Nawng Ing Buga Nawku Jawng kata Myen hpyen dap zaw si adup hpaw nna, dap jung shara jahkrat nga ai lam, ginra masha ni kaw na chye lu ai.
June 25 ya shani Namawn bum na yu wa ai Myen hpyen hpung hte Sam Hkyeng Pyithutsit dap ni Namawn mare kata na Nawku jawng wang ni hte Dama Yung (ဓမ္မာရုံ) shara ni hta wa du dap jung shara la nga nna, Nawku jawng kata na nsen htawn jak ni hpe hpaw let mahkawn hkawn rai pyaw rawng taw nga ai nga, ginra masha langai KNG shiga dap de tsun dan wa ai re.
“Nawku Jawng kaw zaw si ni adup hpaw kau rai na shang rawng taw nga ma ai, ya mung naw rawng nga ma ai, Nawku jawng kata na jak ni hpaw rai mahkawn hkawn na rawng taw ma ai nga, Myen hpyen la ni kaw na nawku jawng hkan nga rai nna, Pyithutsit ni gaw shan hte Dama Yung kaba law nga ai, dai kaw nga taw ma ai,” nga tsun dan ai re.
Lai wa sai bat hta Chaung Wa, Hwi Lung hte Nyaung Pin mare na Myen hpyen dap ni hpe KIA hte PDF pawng hpawm dap ni htim gasat zing madu kau ma ai hpang, Indawgyi nawng makau grup yin na mare kahtawng ni de hpyen masa bai shaja hkat wa ai majaw, dai ginra na mung shawa yawng tinang man ang ai shara ni de hprawng yen ma ai re.
Ya na zawn mung shawa ni hprawng shakram kau da ai Nawku jawng hte mare dum nta ni hkan Myen hpyen dap hte Pyithutsit dap ni hpyen ninggang shatai ai hku na wa du dap jung shara la taw nga ai rai nga ai.
Htim gasat zing madu kau ai mare kahtawng hkan na Mung mare masha ni mung Mai Nawng hte laga mare shara ni de hprawng yen shang wa nna, ya ten dai ginra ni hta hpyen masa bai shaja hkat wa ai majaw, kalang bai hprawng yen hkawm wa ra ai rai nga ai.
Ya ten Lung Tung, Mai Nawng, Mamung Kai, Na Mawn mare hkan na mung mare masha ni gaw, tinang man ang ai nam maling yi sun ni de hprawng yen taw nga nna, garum ningtum ra ahkyak taw nga ai lam ginra masha langai ndai zawn matut tsun ai re.
“Ya hkyak hkyak anhte hprawng yen nga ai shara hta gaw, htingaw 250 jan, laga shara mi kaw gaw hting gaw 100 daram rai sai, ngut na laga nam de, tiang hkau na pa ni de hprawng yen ai ni mung nga ai dai ni na jahpan gaw n chye ai, ya gaw gadai mung gadai gun sa ai hpe naw shadu sha taw nga ai, ya madung ra ahkyak ai gaw nga shara muga hte tsi mawan rai nga ai, matut na ndai hta naw na wa yang gaw anhte grai yak wa na masa nga ai,” nga tsun ai re.
Ya ten Nawnglut ginwang kata na mare kahtawng law malawng yi sun hkau na, nam maling ni de hprawng yen taw nga nna, lanam ndam ta re majaw machyi makaw hkali hka waw ni byin hkrum hkra taw nga ai re.
Dai hpyen yen mung shawa ni gaw, ya ten nawku hpung kaw na mai byin ai hku woi hprawng yen taw nga nna, n dai laman hta gaw tinang gun sa wa ai malu masha ni hpe naw jawm sha taw nga nna, aten n htoi galu wa ai rai yang grai yak hkak wa na masa nga ai lam dai ginra na lit nga ai sara ni matut tsun dan ai re.
Nawnglut Ginwang hpyen yen mung shawa ni hpe ya ten gadai gara wuhpung wuhpawng ni mung garum jaw ai lam n nga ai shi ai rai nna, ya ten rawng na dum nta mu ga ginsum hkyak hkyak ra taw nga ai lam tsun ai re.
Dai ginra hta June 22 ya shani kaw na Myen hpyen dap shara ni nkau hpe KIA PDF pawng hpawm dap ni htim gasat zing madu wa ai hpang ya na zawn, mare mung shawa ni yawng hprawng yen hkawm nga ra ai re.
