Myen Hpyen Dap Nbungli hte Wa Gap Ai Majaw, Wuyan Hte Lamyang Mare Na Mung Shawa Dum N’ta Law Law Hten Hkrum Wa
Waimaw hte Washawng lapran n dai laman majan jahkring hkring byin lai wa ai hta, Myen hpyen dap maga na nbungli bawm sa jahkrat bun ai majaw, mung shawa dum nta law law hten hkrum nga ai lam ginra masha ni tsun ai ai re.
Lai wa sai June 18 hte 19 ya shani Wuyan hte Lamyang mare lapran na Pyithutsit dap shara hpe KIA pawng hpawm dap maga sa htim gap gasat ai hta Myen hpyen dap maga na Dukaba langai si mat ai majaw, dai majan byin ai shara de Myen hpyen dap maga na nbungli hte laja lana wa gap bun wa ai nga Waimaw ginra masha langai KNG shiga dap de tsun ai re.
“June 18 ya shani Lamyang Nawku jawng makau hta gap gasat hkat ma ai, hpang shani hta Nang Zaw Yang sa ai lam hpung gaw hta bai gap gasat hkat wa ai, dai majan ni hta Myen hpyen dap maga na Dukaba langai hte Myen hpyen la law law si hkrum wa ai majaw, Myen hpyen dap maga na laknak kaba nbungli ni hte hkrup mara gap shadam bun ai majaw, mare na dum nta law law hten hkrum wa ai,” nga tsun ai.
Dai majan hta Myen hpyen dap maga sum machyi law ai majaw, lani mi laman nbungli hpan hkum hte 4,5 lang sa gap sharu bun kau da ai re.
Myen hpyen dap maga na ya na zawn nbungli hpan hkum, laknak kaba hte hkrup mara wa gap bun ai majaw, Waimaw hte Washawng mare lapran na, Wuyan, Lamyang, Mukchyik, Nam Wah Washawng mare hkan na mung shawa dum nta law law hten hkrum wa ai re.
Dai mare ni hten hkrum ai hta law dik Lamyang hte Mukchyik mare na rai nna, mare kata na Nawku jawng ni yawng mung hten hkrum mat sai lam ginra masha langai KNG de ndai zawn matut tsun dan ai re.
“Anhte Mare masha yawng ngu na ram gaw Gwihtu maga de hprawng yen taw nga ai le, Nbungli bawm a majaw, Lamyang mare yawng hten mat sai nga nna wa yu ai, ngai na nta htap lahkawng re hpun pyen n ta yawng hten ai yai mat sai, makau hkan na nta mung yawng hten ai, AG Nawku jawng nga yang mung la hpa pyi n nga mat sai, dai mayan na nta ni tsawm ra hten mat sai,” nga tsun dan wa ai re.
Myen hpyen dap maga na ya na zawn mung shawa dum nta hpe yaw shada lam nga nga hte gap gasat ai lam re nga ginra masha ni tsun ai re.
Ndai laman Waimaw ginwang kata KIA PDF dap ni nga ai shara de Myen hpyen dap hte Pyithutsit dap ni hpyen n gun htu shadut taw nga ai sha n ga, shana shagu laknak kaba ni gap bun taw nga ai re lam chye lu ai.
Muk Chyik, Lamyang Mare majan hta Myen hpyen hpung si taw nga ai mang ni lam kaba hta dai hku ayai taw nga nna, hta lup na masha n nga ai majaw yet manam taw nga ai lam ginra masha ni tsun ai re.
Lai wa sai June 11 ya shani Washawng hte Kanpaiti lapran na Myen hpyen dap Pyithutsit BGF dap ni yawng hpe htim gasat zing madu kau ma ai hpang, Waimaw mare makau hta hpyen masa matut shaja hkat taw nga ai re.
