Ka-ni Nanghpam Ninghkap N-gun Madun Ai Lam Hpe Loije Mare Kaba hta Ga Hpan Masum Hte Ninghkap N-gun Madun Ai Lam Galaw
Mungkan Kani Nanghpam Patjasan nhtoi lamang hpe KIO Uphkang ginra Loi Je mare kaba hta galaw wa ai re hpe chye lu ai.
Dai ni June 26 ya shani ang ai Mungkan Kani Nang Hpam Patjasan n’htoi lamang hpe Loi Je mare kata hta nga ai Myen, Sam, Miwa, Jinghpaw mung shawa yawng shang lawm ai ning hkap n’gun madun poi lamang hpe galaw wa sai re.
Kani Nanghpam Patjasan nhtoi lamang hta, Ka-ni Nanghpam gaw amyu sha yawng a hpyen madung re, atsai awai gasat shamyit kau ga, Kani Nang Hpam hkoi san ai mare kaba byin tai hkra yawng jawm shakut ga, Ka-ni Nanghpam dut mari hpaga galaw ai ni hpe ninghkap ga ngu ai, Jinghpaw, Sam, Miwa ga hpan masum hte ning hkap n gun madun wa ai re.
Dai n-gun madun poi lamang hta Loi Je mare kata na mung shawa ni hte makau grup yin mare kahtawng hkan na mung shawa hkying mi jan sa du shang lawm ai hte galaw wa sai re.
Loi Je mare kaba hpe Wunpawng Mungdan Shanglawt Hpyendap KIA htim gasat zing madu kau ai hpang, KIO Uphkang sai ru hte Kani Nanghpam dut mari lu sha ai ni yawng hpe ja ja rim ahkyak la ai lam ni galaw taw nga sai lam ginra masha ni tsun ai re.
