Myaw Maw Pa Mare Hka Mawru hpyen hkrum ai hta, dum nta 10 jan hte nna, Masha Langai Yawng Si Hkrum
Chihpwi Myaw Maw Pa hta Marang Kaba htu nna, hka mawru kaba wa ai majaw, dai mare na dum nta 10 jan hten nna mung shawa marai 1 asak si sum ai lam chye lu ai.
May 29 ya jahpawt manap jau hkying 3 daram kaw na marang kaba htu wa ai gaw, myi mu wa ai hte rau hka kaba tung hkrat wa nna, dai mare na mung shawa dum nta 10 jan hte asak 50 ning ram re Hpawmi jan Lase Lu Nan yawng si lawm mat ai nga dai ginra na mung shawa langai KNG shiga dap de tsun dan wa ai re.
“Nta 10 jan yawng lawm mat sai, hpawmi jan langai mung lawm mat ai nga na ai, moi mang hpe chyawm dai na maga de mu la sai, Phone line gaw n lu matut mahkai grai yak taw nga ai, Nawku jawng wang hkan na arai ni mung yawng lawm mat sai nga tsun ai,” nga tsun dan wa ai re.
Hka kaba tung wa ai hta, dai mare na dum n ta n kau hte arung arai yawng ngu na daram hka de yawng lawm mat nna, dai hka tung ai hta lawm mat ai amyu shayi hpe dai na maga mu tam sai nga tsun ai re.
Dai hpawt hka tung kaba ai Myaw Maw Pa gaw Chihpwi mare the deng 6 daram tsan ai Nmai hka din ai mare rai nna, dai mare makau na Zang Nau yang mare mung hkra hten mat ai lam chye lu ai.
Ya na zawn shara shagu na hka tung kaba wa ai majaw, Nmai Hka kaba tsaw rawt wa nna, Chihpwi Hpyen yen ni bai htawt sit hprawng yen hkawm wa ra ai re.
Chihpwi Hpyen yen dabang hta hka kaba wa ai majaw, Chihpwi Ginwang rung hte makau grup yin hkan na jinghku jingyu dum nta ni hkan machyu shingbyi taw nga ai zawn, garum ningtum lam ni mung ra ahkyak taw nga ai re.
