Sumpyi Yang Hpyen yen mung shawa hkying mi jan gaw ya ten malu masha hte tsi mawan garum ningtum ra ahkyak taw nga ai lam chye lu ai.
Sumpyi yang, Wadat, Nsi yang mare kahtawng 3 na mung shawa yawng 1500 daram gaw lai wa sai May 11 ya shani kaw na Nam maling de hprawng yen taw nga ai n htoi 20 ya hkawt na wa sai majaw, malu masha hte laga tsi mawan lam ni ra ahkyak taw nga ai re.
Nam kata de nga taw ai ten malu masha hte nga na shara yak hkak wa ai majaw, May 16 ya shani nam kaw na bai pru wa nna, ya ten lam kaba makau Hkin Du Yang mare mayan ni hta hprawng yen taw nga ai lam ginra masha langai KNG de ndai zawn tsun dan wa ai re.
“Nnan e gaw Nam de hprawng yen ai, nam de nga yang ya pru lam nmu lam yawng pat mat na tsang ai the malu masha garum ningtum lam ni mung yak hkak ai majaw bai pru wa ai, ya Hkindu Yang mare makau grup yin ni hta jahkring gan hprawng yen nga nna, mai byin ai hku muga ginsum ni hte nga nga ga ai,” nga tsun ai re.
May 16 ya shani mawdaw lam maga de bai pru wa ai law malawng gaw, Sumpyi Yang ginra masha ni rai nna, Nsi Yang hte Wadat mare masha ni gaw, Mali hka kau mayan de hprawng yen ai lam chye lu ai.
Dai hpyen yen mung shawa ni gaw lai wa sai May 11 ya shani mare de Myen hpyen hpung ni du shang wa ai majaw, mare kata majan byin wa na hpe myit tsang ai hte hpyen ninggang shatai rim woi hkrum na hpe hkrit tsang ai majaw, hprawng yen pru wa ai rai nga ai.
Ya ten Nam maling kata na rai n lu pru wa shi ai hpyen yen hting gaw 8 daram naw nga ai rai nna, dai hpyen yen ni hta hkamja lam n nga asak kaba sai ni lawm ai majaw lawan rai n lu pru wa ai rai nna, dai ni a matu tsi mawan garum ningtum ra ahkyak taw nga ai lam matut tsun dan wa ai re.
“Ma kaji ni hte asak kaba sai ni gaw, machyi makaw byin ai law ai, aten galu machyi na taw sai ni mung law ai, tinang kaw lawm sa wa ai malu masha ni jawm pawng sha nna nga taw ai ga rai nga ai, ya garum ningtum lam ni hpa rai n lu shi ai, rawng na dap ginsum gap na matu mung muga n lu na grai yak hkak taw nga ai,” nga matut tsun dan wa ai re.
Matut na rai tim Sumpyi Yang mare kata kaw na n lu hprawng yen mat sai mare hta ngam taw ai asak kaba marai 5 hte hpawn laga marai 9 hpe mung Myen hpyen dap rim woi da ai lam chye lu ai.
Lai wa sai May 15 ya shani mung Sumpyi Yang mare na amyu shayi marai 3 dum nta de wa gan gawan ai ten hta mung Myen hpyen dap ni hkap rim woi da ai kaw na bai lawt pru wa ai ten, laga nam lam hku na bai hprawng sa wa ai majaw, amyu shayi langai lam lapran hka lim si hkrum wa sai re.
Ya ten dai ginra na hpyen yen mung shawa ni gaw, mawdaw lam yawng pat da ai majaw, gara de mung hkawm n mai lam shagu hta yak hkak hkrum taw nga ai re.
