Shwenyaung Pin Myen Hpyen Dap Hk.M.Y (321) dap hpe Wunpawng Mungdan Shanglawt Hpyen Dap KIA hte Pawng hpawm dap maga May 21 ya shana hkying 8 chyen daram hta padang dip zing madu la lu sai re.
Dai dap shara hpe htim gasat zing madu kau ngut ai hpang, Myitkyina maga de na missile dung laknak kaba hte ading ding sha shana tup gap bun wa ai re.
Dai laknak kaba si ni gaw, htap lahkawng kapaw ai Missile laknak baw hpan ni rai nna, Shwenyaung Pin mare makau grup yin hta wa hkrat kapaw law ai nga shawng lam magam gun ni tsun dan wa ai re.
“Shara shagu dumbri dumbra gap shadam ai ga rai nga ai, shara shagu wa hkrat ai, law malawng gaw Shwenyaung pin maga de wa hkrat ai, si hkala ai lam chyawm loi li she n nga na, anhte a tsawm n chye ai, rai tim anhte hpyenla ni gaw yawng man taw sai re majaw hpa n ra ai,” nga tsun ai re.
Myen hpyen dap maga na laknak kaba gap sharu bun wa ai majaw, dai makau grup yin hta nga ai mung shawa yawng hkrit kajawng nna, shana tup n mai yup ai nga, mung shawa ni tsun ai re.
Dai ni May 22 ya shani hta gaw Shwenyaung Pin dap na hprawng pru wa ai Myen hpyen hpung ni hpe makau grup yin yawng hta hkan rim gahkyin taw nga nna, ndai shiga ka nga ai ten du hkra marai 10 daram hpe lu rim da sai lam chye lu ai.
Dai hprawng pru wa ai Myen hpyen la ni hpe san yu ai hta, dai dap shara kaw hpyen n gun tsa kaba dap jung da ai shara rai nna, ya hprawng pru wa ai mung 100 hkawt daram nga ai lam, shawng lam magam gun ni tsun ai re.
Shwenyaung Pin hte Aung Mye (1) (2) makau grup yin de dai ni ndai shiga ka nga ai ten du hkra gaw, sinat laknak mahku zim taw nga ai lam chye lu ai.
KIA hte pawng hpawm dap maga na mung, Myen hpyen dap kata de jasan jaseng galaw ra ai lam ni hpe galaw jasan taw sai re.
Ya ten Waimaw mare makau grup yin yawng hta KIA dap maga shara la da sai rai nna, ya naw matut ngam taw ai Hk.L.Y (58) dap hpe matut htim gasat na masa nga taw ai lam chye lu ai.
Ya na zawn hpyen masa shaja hkat taw nga ai majaw, Waimaw makau grup yin na mung shawa yawng tinang man ang ai shara ni de hprawng yen taw nga ai re.
