Myen Hpyen Dap Gap Dat Ai Laknak Kaba Si A Majaw Mung Shawa Marai 3 Bai Hkala Hkrum
Myen hpyen dap gap dat ai laknak kaba si Hkat Cho mare Kwik Thit maga de wa hkrat kapaw ai majaw, amyu shayi marai 3 hkala hkrum wa ai lam chye lu ai.
Mani May 21 ya shana maga de hkying 3 daram hta Myitkyina maga na gap dat ai laknak kaba si Hkat Cho Kwik Thit lawk maga de 4 lang wa hkrat kapaw ai hta, Lisu hpawmi marai masum hkala hkrum wa ai nga, dai mare na mung shawa ni KNG shiga dap de ndai zawn tsun dan wa ai re.
“Myitkyina maga na gap dat ai laknak kaba si bai wa hkrat ai, si ai gaw n lawm ai, hkala ai marai 3 re, yawng amyu shayi hkrai, langai hpe gaw hkala sawng na Myitkyina de htaw sa da ai zawn, ngam ai 2 hpe Waimaw mung shawa tsi rung hta wa sa da sai,” nga tsun ai re.
Dai hkala hkrum ai ni gaw, asak 42 ning re Daw Htoo Hpu Sah, asak 41 ning re Daw Da Mali, asak 36 ning re Daw Lah Masi ni re lam chye lu ai.
May 20 ya shani hta mung, Myen hpyen dap laknak kaba a majaw, Hkat Cho mare na mung shawa marai 6 asak si sum nna, marai 11 hkala hkrum wa ai re.
Ndai laman Myitkyina Noikret sun lawk maga de na, Waimaw hkran maga de gap bun ai laknak kaba si ni mung shawa dum nta wa hkrat ang ai majaw, ya na zawn si hkala hkrum ai lam ni byin taw ai re.
Mana maga May 21 ya shana hta sha, Waimaw Myen Hpyendap hte balik dap hpe KIA dap maga Drone hte laknak kaba sa jahkrat bun ai hta, Balik du hte hpawn marai 4 si ai lam shawng lam magam gun nit sun ai re.
Hpyen dap hte balik dap hpe kalang dat sa gap bun ai rai nna, Balik dap hpe gap ai ten laknak kaba 6 sa jahkrat bun ai hta si hkala ai lam nga wa ai re nga shawng lam magam gun ni tsun ai re.
Ya na zawn Waimaw balik dap hpe sa gap ai teng ai rai tim, gade si ai ngu hpe KNG maga a tsawm tup hkrak san shateng la lu ai lam n nga ai re.
Matut nna rai tim, Myen hpyen dap hpe mung drone hte lakna kaba 10 lang jan sa jahkrat bun wa ai re.
