Myen Hpyen Dap Laknak Kaba Si A Majaw Mung Shawa Marai 6 Si nna, Marai 11 Hkala
Myitkyina Noikret Sun lawk, ကြံ့ခိုင်ရေး rung kaw na gap dat ai laknak kaba si lahkawng, Hkat Cho mare na Slg Mg Lay hte Kyaw Oo yan a dum nta wa hkrat hkra ai majaw, mung shawa marai 6 si nna, marai 11 hkala hkrum wa ai lam ginra masha ni kaw na chye lu ai.
Dai ni May 20 ya shana maga de hkying 2 daram hta, Myitkyina Noikret Sun Lawk kaw na gap dat ai 120mm ngu maram lu ai laknak kaba si mung shawa dum nta wa hkrat ang ai majaw ya na zawn si hkala law wa ai re nga, dai ginra na mung shawa langai KNG de tsun dan wa ai re.
“ Dai hpawt hkying 11 daram hta Hkat Cho Kwik Thit lawk kaw wa hkrat ai Slg Mg Lay hte Kyaw Oo yan a dum nta wa hkrat ang ai, marai 6 si nna, marai 11 hkala ai, hkala ai ni hpe gaw, Myitkyina tsirung de htaw sa da ai,” nga tsun dan wa ai re.
Ya Myen hpyen dap gaw, dap shara n re ai mung shawa yawng hte seng ai shara ni hta laknak kaba shadun nna, ya na zawn hkrup mara gap shadam bun ai majaw, mung shawa si hkala hkrum wa ai re nga tsun ai re.
Dai na maga de hkying 2 daram hta mung Dalaw mare maga de Myen hpyen Jet Fighter nbungli hte sa gap bun ai majaw, mung shawa marai 2 hkala sawng wa ai re lam chye lu ai.
May 19 ya shana hta mung, Waimaw Hk.L.Y (58) dap na gap shadam dak ai laknak kaba si Mukchyik mare wa hkrat ang ai majaw, dai mare na Lasaw Ze Naw ngu ai amyu shayi langai asak si sum wa ai re.
Myen Hpyen dap maga ya na zawn laknak kaba gap shadam bun ai majaw, mung shawa si hkala ai lam ni jahkring hkring byin nga ai re.
Ya ten KIA hte pawng hpawm dap maga Waimaw ginwang hpe htim shagrawt taw nga ai hta majan laja lana matut gap gasat taw nga ai re.
