Myitkyina Waimaw Makau Grup yin ni hta ngoi kadu taw nga ai laknak kaba ni gaw gara kaw na gap bun ai ni rai kun?
Myen hpyen dap kaw na shani shana laknak kaba gap shadam bun ai majaw, Myitkyina, Wai Maw hkan na mung shawa ni hkrit kajawng let, shana tup yup nmai hkrit myit ni hte tawt lai taw nga ai lam ginra masha ni kaw na chye lu ai.
May 18 ya jahpawt Waimaw Ginwang kata nga ai Myen hpyen dap shara ni hpe KIA dap maga htim gasat hpang wa ai hte rau Myen hpyen dap maga na mung, laknak kaba shani shana gap sharu bun nga ai majaw, ginra masha ni hkrit myit ni hte nga taw ra ai lam, Myitkyina ginra na mung shawa ni KNG shiga dap de tsun ai re.
“Mana gaw shana tup yup n mai ai, lamu ga she gara ai, grai ni kahtep wa ai zawn nga ai gara de hprawng ra na re mung n chye dai hku maja na sha nhtoi jahtoi kau sai,” nga tsun ai re.
Myen hpyen dap ni gaw, M.P.Hk, Maw Hpawng, Hk.L.Y (37) dap, Noikret sun lawk, Nbungli dap hte Jamga mare lapran mali hka zinlawng hte Waimaw (58) dap ni kaw na laknak kaba ding yang gap shapraw taw nga ai re lam, shawng lam hpyen magam gun ni tsun ai re.
Dai shara ni kaw na, Waimaw Aungmye (1) Aungmye (2) Shwenyaung Pin, Hkatsu maga ni de gap bun ai rai nga ai.
Myen hpyen dap maga gap shapraw taw nga ai laknak kaba ni gaw, 120 mm, 105 mm laknak kaba hpan ni re majaw, makau grupyin yawng de kadu gara ai majaw, mung shawa ni hkrit kajawng ai re lam shawng lam magam gun langai ndai zawn tsun dan ai re.
“Ya shan hte lang ai laknak kaba law malawng gaw, 120mm hte 105 mm ni re, ya majan byin ai shara gaw mare kaba ni hte ni ai re nga yang, gadu gara ai le, dai majaw grau hkrit ai ga rai nga ai.” nga tsun ai re.
Ya ten Waimaw mare kaba makau grup yin hta KIA hte pawng hpawm dap maga shara la da nna, Myen hpyen dap hte laja lana gap gasat hkat taw nga ai mung rai nga ai.
