Waimaw mare kaba makau de Majan nhpan laja wa ai majaw, mare kaba hte ni ai mare kahtawng 15 na mung shawa yawng tinang man ang ai de hprawng yen taw sai lam chye lu ai.
Ya ten, Waimaw Myen hpyen dap Hk.L.Y (58) dap hte ni ai Hkakum, Wuyan, Mukchyik, Lamyang, Namwa, Labang mare hkan na mung shawa ni yawng htawt sit hprawng yen nga sai lam dai ginra na mung shawa langai KNG de tsun dan wa ai re.
“Shani shana laknak kaba ngoi rai yang gaw gadai n dang hkam ai yawng hprawng sai ga rai nga ai, ya Waimaw mung bai zing na nga shiga a majaw yawng yen sai,” nga tsun dan wa ai re.
Wamaw hte Manmaw lam mayan de na Shwenyaung pin, Aungmye (1) (2) Inlay, Hka Shi mare hkan na ni gaw lai wa sai praw 7 ya shani hkan na hprawng yen taw ai ni nga ai zawn, n kau rai nlu hprawng yen shi ai ni hpe,Hpungkyi Saradaw hte PCG ni jahkrup bawng ban nna sa woi shaw la lu sai lam chye lu ai.
Matut na rai tim Mali hka kau maga de na mare ni rai nga ai, Hkat Cho, Mahkanti, Nawng Hkyi, Jam Ga, Da Jang, Hkang Lung, Mai Maw mare ni hta nga ai mung shawa n kau hprawng yen lu sai rai tim, law malawng gaw dai ginra hta yi sun hkauna galaw let law malawng matut naw nga taw ai re.
“Mi gaw dai ram sawng wa na n shadu ai she n rai i? ya gaw shani shana laknak kaba hkrai ngoi gadu wa yang gaw hprawng yen na galaw wa ai rai tim, ya gaw Myen ni lam yawng pat kau sai, dai hku tinang ladat hte tinang nga taw ai ga rai nga ai,” nga tsun ai re.
Ndai laman Myitkyina maga de na gap dat ai laknak kaba si ni dai mare makau grup yin hta jahkring hkring wa hkrat nga ai majaw, ginra masha ni hkrit kajawng ai lam ni byin nga ai re.
Ya na zawn Myen hpyen dap laknak kaba gap sharu bun taw ai majaw, mung shawa ni hprawng yen mayu ai rai tim, Myen hpyen dap maga lam ni yawng pat kau sai majaw, yak hkak jam jau hkrum nga ai re.
Ya ten Shwenyaung Pin Myen hpyen dap hpe KIA htim shagrawt taw nga ai hta, Myen hpyen dap maga nbungli hpan hkum hte sa ninghkap shingla gasat taw nga ai re.
