Sumprabum Myen hpyen dap hpe htim shagrawt gasat kau lu ai n htoi 10 ya na sai rai tim, mare kata majan ten na laknak angaw angam ni hpe rai n lu jasan shi ai majaw, mare masha ni mare de gadai rai n wa shi na lam, KIA maga matsun da ai nga, ginra masha ni kaw na chye lu ai.
Ya ten Sumprabum mare kaba hpe KIA hte pawng hpawm dap maga zing madu da lu sai rai tim, mare kata na, laknak machyu pala angaw angam ni hpe a tsawm rai n lu jasan shi ai majaw, gadai mung rai n wa shi na lam, KIA maga matsun da ai nga, dai ginra na mung shawa langai KNG de ndai zawn tsun dan wa ai re.
“Nhtoi shata lahkawng hkawt na ai majan ten laman na laknak machyu pala ni a tsawm rai n lu seng shi ai da, ngut na dai mare kaw gaw Myen hpyen dap masha ni mung law ai re nga yang, phone n kau hpe mung zing da ya ai, KIA maga na mai wa sai lam matsun sha n lu ding sa gadai mung nmai wa ai,” nga tsun dan wa ai re.
Shata lahkawng hkawt na Sumprabum majan hta, mung shawa dum nta 10 jan hkra hten mat nna, Myen hpyen dap hte ni ai asuya rung ni yawng mung hten ayai ma ai lam chye lu ai.
Ya ten Sumprabum mayan hta Myen hpyen dap nbungli hpe naw maja ra taw ai zawn, Putao lam maga de na Pyithutsit hte Myen hpyen hpung ni hpyen n-gun 100 jan hte htu shadut taw nga ai re.
Sumprabum Myen hpyen dap hpe KIA hte KPF KPDF pawng hpawm dap ni kaw na, March 14 ya shani kaw na htim gasat hpang wa ai gaw, May praw 5 ya jahpawt yawng zep zi htim gasat zing madu kau lu sai re.